सुर्खेत, ७ असार-सुर्खेतको भेरीगंगा नगरपालिका- ५ भर्रेनीका ३५ वर्षीय युवकको १४ दिन क्वारेन्टाइन बसेर घर फर्किएपछि मृत्यु भएको छ । भारतको सिम्लाबाट आएर क्वारेन्टाइनमा बसेर गत २९ जेठमा घर फर्किएका युवकको आइतबार बिहान मृत्यु भएको हो ।

भेरीगंगा नगरपालिकाको शारदा माध्यमिक विद्यालय छिन्चुमा रहेको क्वारेन्टाइनमा १४ दिन बसेका उनलाई आरडीटी गर्दा कोरोना नेगेटिभ देखाएकाले घर पठाइएको भेरीगंगा नगरपालिकाका स्वास्थ्य शाखा प्रमुख राजेश बुढाले बताए । ‘पीसीआर परीक्षणका लागि मृतकको स्वाब सङ्कलन गर्न स्वास्थ्यकर्मीको टोली आइपुगेको छ’, उनले भने, ‘आरडीटी विधि त्यति भरपर्दो हुँदैन ।’

स्वास्थ्य शाखा प्रमुख बुढाका अनुसार पीसीआर विधिबाट परीक्षण रिपोर्ट आएपछि मृतकको दाहसंस्कार गरिनेछ । गत १६ जेठमा भारतबाट आएर उनी १४ दिन क्वारेन्टाइनमा बसेपछि नगरपालिकाले आरडीटी टेस्ट गर्दा कोरोना नेगेटिभ देखाएपछि घरमा सावधानी अपनाएर बस्न भनेको थियो ।