रुकुम घटना छानबिन संसदीय समिति गठन - News Birat

रुकुम घटना छानबिन संसदीय समिति गठन

न्यूज विराट

काठमाडौं, २६ जेठ-६ जना युवाको ज्यान जाने गरी भएको रुकुम पश्चिमको घटना छानबिनका लागि संसदीय विशेष समिति गठन भएको छ । सांसद देवन्द्र पौडेलको संयोजकत्वमा ९ सदस्यीय संसदीय छानबिन समिति गठन भएको हो ।

सांसदहरूले छानबिन समितिको माग गर्दै संसद अवरुद्ध गरेपछि सभामुख अग्नि साप्कोटाले दलहरूसँग छलफल गरेर समिति बनाउने प्रतिवद्धता व्यक्त गरेका थिए । समितिका सदस्यमा एकवाल मिया, दुर्गा पौडेल, पार्वतीकुमारी विशुन्के, प्रकास रसाइली, विमला विक महेश्वरजंग गहतराज, मीनबहादुर विश्वकर्मा, रामसहायप्रसाद यादव सदस्य रहेका छन् ।

समितिलाई उक्त घटना छानबिनका लागि ३० दिनको समय दिइएको छ । सभामुखको निर्देशनमा रही समितिले आफ्नो कार्यविधि तय गरि लागू गर्न सक्ने, समितिले आवश्यक देखेका सम्बन्धित पदाधिकारी वा अन्य व्यक्तिको सहयोग लिन वा समितिमा आमन्त्रणसमेत गर्न सक्ने अधिकार समितिलाई दिइएको छ । समितिको अन्य कार्यविधि प्रतिनिधिसभा नियमावली २०७५ बमोजिम उनले उल्लेख गरिएको छ ।

१० जेठमा सोतीस्थित मल्ल थरकी प्रेमिकालाई बिहे गरेर लैजान जाजरकोटबाट आएका युवामाथि गाउँलेले आक्रमण गरेका थिए । आक्रमणमा ६ जना युवाको ज्यान गएको थियो । त्यस घटनामा परेर भेरी नगरपालिकाका नवराज विक, गणेश बुढा मगर, सन्दीप (सञ्जु) विक, लोकेन्द्र सुनार र गोविन्द शाही, चौरजहारी नगरपालिकाका टीकाराम नेपालीको ज्यान गएको थियो । उनीहरू सबैको शव भेरी नदीआसपास भेटिएको थियो ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles