काठमाडौं, असार १-नेपालमा सोमबार थप ४५१ जना नयाँ संक्रमित थपिएको स्वास्थ्य मन्त्रालयले जनाएको छ । स्वास्थ्य मन्त्रालयका प्रवक्ता डा. जागेश्वर गौतमले सोमबार ३५ महिला ४१६ जना पुरुष गरी ४५१ जनामा कोरोना संक्रमण पुष्टि भएको जानकारी दिएका हुन् ।

योसँगै नेपालमा कोरोना संक्रमणको संख्या ६ हजार नाघेको छ । स्वास्थ्य मन्त्रालयका अनुसार सोमबारसम्ममा नेपालमा कोरोना संक्रमिको संख्या ६ हजार २११ पुगेको छ । जसमध्ये ४७१ जना महिला रहेका छन्  भने ५ हजार ७४० जना पुरुष रहेका छन् । नेपालमा ७३ जिल्लामा कोरोना संक्रमण फैलिएको स्वास्थ्य मन्त्रालयले जनाएको छ ।

स्वास्थ्य मन्त्रालयका अनुसार १ लाख ३८ हजार ६ सय ८३ नमुनाको पीसीआर विधिबाट परीक्षण गरिएको छ । २ लाख १९ हजार ३ सय ३६ जनाको आरडीटी विधिबाट परीक्षण गरिएको छ । २४ घण्टाको अवधिमा ५ हजार ३०६ नमुना पीसीआर विधिबाट र ८ हजार ६१५ जनाको आरडीटी विधिबाट नमुना परीक्षण गरिएको छ । हालसम्म क्वारेन्टाइनमा बस्नेहरूको संख्या १ लाख ३३ हजार १२९ जना रहेका छन् भने ५ हजार १५१ आइसोलेसनमा रहेका छन् ।