काठमाडौं, २९ जेठ-नेपालमा बिहीबार थप २ सय ५० जनामा कोरोना भाइरस संक्रमण पुष्टि भएको छ । स्वास्थ्य मन्त्रालयको नियमित पत्रकार सम्मलेनमा प्रवक्ता डा. जागेश्वर गौतमले २४ घण्टाको अवधिमा थप २ सय ५० जनामा कोरोना संक्रमण पुष्टि भएको जानकारी दिएका हुन् । उनका अनुसार देशका विभिन्न प्रयोगशालामा गरिएको परीक्षणमा नेपालमा थप २ सय ३० पुरुष र २० महिला गरी संक्रमित थपिएका हुन् ।

योसँगै नेपालमा कोरोना संक्रमितको संख्या ४ हजार ६ सय १४ पुगेको छ । जसमध्ये ४ हजार २ सय ८५ जना पुरुष छन् भने ३ सय २९ जना महिला रहेका छन् । नेपालका ७२ जिल्लामा कोरोना संक्रमण फैलिएको छ । नेपालमा गत २४ घण्टाको अवधिमा उपचारपछि निको भएर १ सय ८७ जना डिस्चार्ज भएको स्वास्थ्य मन्त्रालयले जनाएको छ ।

स्वास्थ्य मन्त्रालयको बिहीबारसम्मको तथ्यांकअनुसार १ लाख १५ हजार ९ सय ३० नमुनाको पीसीआर परीक्षण गरिएको छ । १ लाख ७८ हजार १ सय ४३ जनाको आरडीटी परीक्षण भएको छ । गत २४ घण्टामा ५ हजार १ सय ९४ नमुनाको पीसीआर विधिबाट र ५ हजार २ सय ६३ आरडीटी परीक्षण गरिएको छ ।

१ लाख ६२ हजार १३ जना देशभरका विभिन्न क्वारेन्टाइनमा र ३ हजार ७ सय ३८ जना उपचार क्रममा आइसोलेसनमा रहेका प्रवक्ता डा. गौतमले जानकारी दिए । हालसम्म कोरोना भाइर संक्रमणबाट नेपालमा १५ जनाको मृत्यु भएको छ ।