प्रमुख प्रतिपक्षी दल नेपाली कांग्रेसका नेता शेखर कोइरालाले कोरोना भाइरस संक्रमणको घडीमा सरकार नागरिकको जीवन रक्षाप्रति गम्भीर नभएको आरोप लगाएका छन् । उनले नागरिकको रक्षा गर्न र एकताबद्ध हुनुपर्ने बेला उल्टै लकडाउनको अवसर छोप्दै राजनीतिक दल र संवैधानिक परिषद् सम्बन्धी अध्यादेश द्रुत गतिमा जारी गरी सरकारले जनमतको दुरुपयोग गर्दै सर्वसत्तावादतर्फ उन्मुख भएको बताए ।

उनले मंगलबार जारी गरेको विज्ञप्तिमा सरकारले संसदीय व्यवस्था नै समाप्त पार्न त लागेको होइन भन्ने शंका उब्जिएको उल्लेख गरेका छन् । उनले लोकतन्त्रिक संसदीय व्यवस्था रक्षार्थ कांग्रेस जस्तोसुकै कदम पठाउन पनि पछि नपर्ने बताए ।

‘यस्तो दुर्भाग्यपूर्ण निर्णयबाट सरकारले संयमता गुमाएको र संवेदनहीन बनेको पुष्टि हुन्छ । सरकारको प्रधान दायित्व कोभिड-१९ कारण भोकमारीमा परेका र थातथलो जान नसकेका नेपाली जनताको संरक्षण गर्नु हो’ उनले भनेका छन्, ‘यस्तो अवस्थामा सत्ताको उन्मादमा परेर राजनीतिक पाइदाको खेल प्रस्तुत गर्नुले चरित्र उदांगो भएको छ । र यो नेपाली राजनीति इतिहासकै दुःखद घटना मध्ये एक हो ।’

उनले प्रधानमन्त्रीको बेमौसमी बाँसुरीले संविधानले संवैधानिक नियुक्तहरूमा गरेको साझा स्वामित्वको परिकल्पनामाथि घात र जनमतको अपमान गरेको पनि बताएका छन् । उनले सरकारले चालेको कदम र राष्ट्रपतिबाट हतारमा गरिएको प्रमाणीकरणले राष्ट्रप्रमुख कसैको गोटी वा दलभित्रको गुटको मात्रै भएको सन्देश गएको उल्लेख गरेका छन् ।