एजेन्सी, जेठ २८-अफगानिस्तानको चर्चित मजार ए शरीफ मस्जिदमा पालिएका करिब एक हजार सेतो परेवा मरेका छन् । लकडाउनका कारण मस्जिदमा खानेकुरा नपाउँदा सो मस्जिदमा पालिएका ति परेवाको मृत्यु भएको हो ।

लकडाउनका कारण लामो समयसम्म मस्जिद बन्द हुँदा परेवाले खानेकुरा पाएका थिएनन् । १२ औं शताब्दीको यो मस्जिद नीली मस्जिदका नामले समेत प्रसिद्ध छ । यसका ढुंगा नीलो रंगका रहेका छन् ।

मस्जिदको हेरचाह गर्ने कायुम अन्सारीले खानेकुरा दिन कोही नआउँदा लगातार परेवाहरु मरेको बताए । उनले भने, ‘हरेक दिन करिब ३० भन्दा बढी परेवा मरिरहेका छन् । मैले मरेका परेवालाई मस्जिदकै बाहिर गाढ्ने गरेको छु ।’

उनले हालसम्म एक हजारभन्दा बढी परेवा मरिसकेको जानकारी दिए । लकडाउनका कारण अफगानिस्तानमा मस्जिदसहित धार्मिक भवनहरु बन्द रहेका छन् ।