एजेन्सी, जेठ २८-चीनले अस्ट्रेलियामा अध्ययनरत आफ्ना विद्यार्थीहरुलाई आगामी दिनमा ‘नस्लवादी हमला’ को सामना गर्नुपर्ने अवस्था आउने भन्दै सावधानी अपनाउन आग्रह गरेको छ ।

चीनको शिक्षा मन्त्रालयले एक विज्ञप्ति जारी गर्दै आफ्नो देशका विद्यार्थीलाई सचेत गराएको हो । मन्त्रालयले भनेको छ, ‘महामारीका क्रममा अस्ट्रेलियामा एसियाली मूलका मानिसहरुमाथि भेदभावका केही घटना बाहिर आएका छन् । यस्ता घटनामा एसियाली मानिसलाई जानीबुझीकन निशाना बनाएको देखिएको छ । विश्व स्तरमा अझै कोभिड–१९ लाई प्रभावकारी ढंगले नियन्त्रण गरिएको छैन । यस्तो अवस्थामा यात्रा र विश्वविद्यालयका खुला परिसरमा घुम्नु जोखिमपूर्ण हुनसक्छ ।’

तर अस्ट्रेलियाका शिक्षामन्त्री डेन तेहानले चीनको दाबी गलत भएको बताए । उनले अस्ट्रेलियाका विश्वविद्यालय पूर्ण रुपमा सुरक्षित रहेको पनि बताए ।

उनले भने, ‘अन्तर्राष्ट्रिय विद्यार्थीमा पढाईका लागि अस्ट्रेलिया एक लोकप्रिय स्थान हो । किनकि उनीहरुले सफलतापूर्वक पढाई पूरा गर्न पाएका छन् । हाम्रो देशमा केही प्रकारका सांस्कृतिक पृष्ठभूमि भएका विद्यार्थीहरु अध्ययन गर्छन् र उनीहरु विश्व स्तरको शिक्षा ग्रहण गरिरहेका छन् ।’  उनले अस्ट्रेलिया कोराना भाइरस नियन्त्रणमा सफल भएको र विश्वविद्यालयहरु पनि सुरक्षित रहेको बताए ।