काठमाडों, २१ जेठ-राष्ट्रियसभाका अध्यक्ष गणेशप्रसाद तिमल्सिनाले २२ जेठदेखि आफूले पाउने कुनै पनि खालका भत्ता नलिने घोषणा गरेका छन् । मुलुक कोरोना भाइरस संक्रमणको महामारीविरुद्ध लडिरहेको भन्दै यस्तो बेला आफूले कुनै पनि भत्ता नलिने उनको घोषणा छ ।

‘सार्वजनिक खर्चमा मितव्ययिता ल्याउन २२ जेठ २०७७ देखि २०७७ साल चैत मसान्तसम्म संघीय संसद, राष्ट्रियसभाको बैठक भत्ता तथा विभिन्न कामको सिलसिलामा मुलुकभित्र भ्रमण गर्दासमेत कुनै पनि भ्रमण भत्ता नलिने कुरा जानकारी गराउँदै उक्त भत्ताहरू नेपाल सरकारको राजस्व खातामा जम्मा गरिदिनुहुन,’ तिमल्सिनाले संसद सचिवालयलाई पत्राचार गर्दै भनेका छन् ।

यसअघि राष्ट्रिसभाका सदस्य नारायणकाजी श्रेष्ठले कर्मचारीको भत्ता काटिने तर सांसदको नकाटिनुले विभेद भएको भन्दै सावर्जनिक आपत्ति जनाएका थिए ।