विराटनगर, जेठ २१–मोरङको कटहरीमा जनता आवास कार्यक्रम अन्र्तगत १५ वटा घर निर्माण हुने भएको छ । प्रदेश १ का सामाजिक विकास मन्त्री जीवन घिमिरेको निर्वाचन क्षेत्र विकास कार्यक्रम अन्तर्गत १५ लाख रुपैयाँ र जीवन विकास संस्थासँगको सहकार्यमा घर निर्माण गर्न लागिएको हो । कटहरी २ को कदमगाछीमा निर्माण गरिने घरको बुधबार सामाजिक विकास मन्त्री जीवन घिमिरेले शिलान्यास गरे ।

शिलान्यास कार्यक्रममा कटहरी गाउँपालिकाका अध्यक्ष रामकुमार कामत उपाध्यक्ष मञ्जिता सरदार लगायतको उपस्थिति रहेको थियो । घर निर्माणको शिलान्यास गर्दै मन्त्री घिमिरेले घर निर्माण कार्यलाई निरन्तरता दिनुपर्ने बताउँदै सो क्षेत्रको सवै सुकुम्बासी समस्या समाधान गरिने जानकारी दिए । चालु आर्थिक वर्षबाट सवै सुकुम्बासीको घर निर्माण कार्यले निरन्तरता पाउने आश्वासन दिए । १५ वटा घर चालु आर्थिक वर्षभित्रमा सकिने लक्ष्य राखिएको छ ।

शिलान्यास कार्यक्रममा नेपाल कम्युनिष्ट पार्टी(नेकपा) १ नं. प्रदेश कमिटि सदस्य मृत्युञ्जयकुमार झाले घरवाससहित उचित व्यवस्थापन गरि सो वडामा सुकुम्बासी मुक्त वडा बनाइने बताए । उनले सडक तथा खोला किनारमा बसोबास गर्दै आएका सुकुम्बासी परिवारलाई जग्गासहित घर निर्माण गरेर उक्त वडा सुकुम्बासी मुक्त बनाइने र त्यसका लागि सरकारले सहयोग गर्ने बताए ।