काठमाडौं, १४ जेठ-नेपालमा एकै दिन १ सय १४ जनामा कोरोना संक्रमण पुष्टि भएको छ । धरानको बीपी स्वास्थ्य विज्ञान प्रतिष्ठानको प्रयोगशालामा गरिएको परीक्षणमा ११ जनामा पोजिटिभ देखिएका छन् । कोसी अस्पतालमा गरिएको परीक्षणमा १७ जनामा संक्रमण पुष्टि भएको छ । हेटौँडाको प्रयोगशालामा गरिएको परीक्षणमा ८ जनामा कोरोना संक्रमण देखिएको छ ।

पोखराको प्रादेशिक प्रयोगशालामा गरिएको परीक्षणमा ७ जनामा संक्रमण पुष्टि भएको छ । दाङको राप्ती स्वास्थ्य विज्ञान प्रतिष्ठामा गरिएको परीक्षणमा १८ जनामा कोरोना संक्रमण पुष्टि भएको स्वास्थ्य मन्त्रालयले जनाएको छ ।

भेरी अस्पतालको प्रयोगशालामा गरिएको परीक्षणमा १६ जनाको नमुनाको पोजिटिभ रिपोर्ट आएको हो । त्यसैगरी, काठमाडौंको टेकुमा रहेको राष्ट्रिय जनस्वास्थ्य प्रयोगशालामा ३८ जनामा कोरोना संक्रमण पुष्टि भएको छ ।

बुधबारसम्म १ सय ८३ जनाले कोरोना भाइरसलाई जितेर अस्पतालबाट डिस्चार्ज भएका छन् । डिस्चार्ज हुनेमा १ सय ४२ जना पुरुष र ४१ जना महिला रहेका छन् ।

स्वास्थ्य मन्त्रालयको पछिल्लो विवरणअनुसार पीसीआर विधिबाट ५८ हजार २ सय ७७ नमुना परीक्षण गरिएको छ । आरडीटी विधिबाट गरिएको परीक्षणको संख्या १ लाख नाघेको छ । आरडीटी विधिबाट अहिलेसम्म कुल १ लाख २ सय ७८ जनाको परीक्षण गरिएको स्वास्थ्य मन्त्रालयले जनाएको छ ।

२४ घण्टाको अवधिमा  ३ हजार ५ सय ८० नमुना पीसीआर विधिबाट र २ हजार ३ सय २० जनाको आरडीटी विधिबाट परीक्षण गरिएको जानकारी स्वास्थ्य मन्त्रालयले जानकारी दिएको छ ।