एजेन्सी, जेठ १३-अमेरिकी राष्ट्रपति पदका लागि आगामी नोभेम्बरमा हुने निर्वाचनमा डेमोक्र्याटिक पार्टीबाट उम्मेदवार बन्ने पक्का भएका नेता जो बाइडेन मार्चपछि पहिलो पटक घरबाहिर निस्किएका छन् ।

पूर्व उपराष्ट्रपति समेत रहेका बाइडेन करिब १० सातापछि मास्कसहित घरबाहिर निस्किएका हुन् । कोरोना भाइरसको महामारी नियन्त्रणका लागि लगाइएको लकडाउनको पालना गर्दै उनी दुई महिनाभन्दा लामो समय घरभित्रै बसेका थिए ।

गृह राज्य डेलावरमा भएको मेमोरियल डे अन्तर्गतको कार्यक्रममा बाइडेन श्रीमती जिलसहित कालो मास्क लगाएर सहभागी भएका थिए । अमेरिकी सेनामा रहेर सेवा गर्दागर्दै मृत्यु भएकाको सम्झनामा अमेरिकामा हरेक वर्ष मे को अन्तिम सोमबार मेमोरियल डे मनाइन्छ । सोही कार्यक्रममा उनी श्रीमतीसहित उपस्थित भएका हुन् ।

मास्क लगाएरै पत्रकारसँग कुरा गरेको बाइडेनले घरबाट बाहिर निस्कन पाउँदा खुशी लागेको बताए । उनले सहादत प्राप्त सैनिकहरुप्रति सम्मान प्रकट गर्दै उनीहरुले गरेको त्याग कहिल्यै बिर्सन नहुने बताए ।

राष्ट्रपति डोनाल्ड ट्रम्प पनि सोमबार श्रीमती मेलानिया ट्रम्पसहित मेमोरियल डे का दुई कार्यक्रममा सहभागी भएपनि उनले मास्क लगाएका थिएनन् ।

उनले कोरोना भाइरसको संक्रमणबाट जोगिन मास्क लगाउन अस्वीकार गर्दै आएका छन् । उनले पछिल्ला दिनमा केही स्थानमा मास्क लगाएपनि पत्रकारहरुका सामू मास्क लगाएर उपस्थित भएका छैनन् ।