काठमाडौं, ११ जेठ-संघीय संसदको प्रतीकका रूपमा रहेको लोगो परिवर्तन गरिने भएको छ । राष्ट्रियसभाको कार्यव्यवस्था परामर्श समिति बैठकले लोगो परिवर्तन गर्ने निर्णय गरेको हो ।

सरकारले नेपालको अद्यावधिक नक्सा जारी गरेपछि संसदको लोगोमा प्रयोग भएको नक्सा परिवर्तन गर्नुपर्ने भएकाले समितिले सो निर्णय गरेको हो ।

संघीय संसद सचिवालयका सहायक प्रवक्ता दशरथ धमलाले सरकारले नेपालको परिवर्तित नक्सा राजपत्रमा प्रकाशन गरेपछि लोगोमा प्रयोग भएको नक्सा सोहीअनुसार परिवर्तन गर्ने निर्णय गरिएको बताए ।

राष्ट्रियसभा नियमावली २०७५ को नियम २२१ अनुसार सांसदहरूको पोशाक र संघीय संसदको प्रतीक कार्यव्यवस्था परामर्श समितिको परामर्शमा अध्यक्षले तोकेबमोजिम हुने व्यवस्था छ । बैठकले जेठ १२ गतेका लागि बोलाएको बैठक एक दिन पर सारेको छ । १२ गते मुस्लिम समुदायको पर्व इदुल फित्र परेकाले बैठक एक दिन पर सारिएको हो । बैठक १३ गते ११ बजे बस्नेछ ।

आइतबार सभामुख अग्नि सापकोटाको अध्यक्षतामा बसेको प्रतिनिधिसभा कार्यव्यवस्था परामर्श समितिको बैठकले संघीय संसदको प्रतीक (लोगो) र प्रतिनिधिसभाका सदस्यहरूले प्रयोग गर्दै आएको प्रतीकलाई नेपालको वास्तविक सीमाअनुरूपको नक्साअनुुसार परिमार्जन गर्ने निर्णय गरेको छ ।

सिंहदरबारमा बसेको बैठकको निर्णयअनुसार रोष्ट्रममा राखिएको प्रतीक (लोगो)  र सांसदहरूले लगाउँदै आएको प्रतीक परिमार्जन हुनेछ । बैठकले सो निर्णय कार्यान्वयन गर्न तत्काल प्रक्रिया अघि बढाउन संघीय संसद सचिवालयलाई निर्देशन दिएको छ ।