काठमाडौं, १० जेठ-भारतका वरिष्ठ वामपन्थी पत्रकार आनन्द स्वरुप बर्माले नेपालले हालै आफ्नो नक्सामा सामेल गरेको भूभाग नेपालकै भएको बताएका छन् । आजतकसँगको कुराकानीमा वरिष्ठ पत्रकार बर्माले यो क्षेत्रमा सन् १९६२ मा भएको भारत–चीन युद्धमा तत्कालीन नेपालका राजा महेन्द्रसँग अनुरोध गरेर कालापानीमा भारतीय सैनिक राखेको स्मरण गराएका छन् ।

उनले भारतीय अतिक्रमणमा परेको लिम्पियाधुरा, लिपुलेक र कालापानी क्षेत्र नेपालकै रहेको भन्दै यो समस्या दुवै देशले वार्ता गरेर समधान गर्न सक्ने बताए ।

‘कालापानी नेपालको भूभाग हो,’ बर्माले भनेका छन्,’ सन् १९६२ मा भारत–चीनबीचको युद्धमा राजा महेन्द्रसँग अनुरोध गरेर भारतले केही समयका लागि कालापानीमा सेना राखेको थियो ।’

उनले थपे, ‘त्यहाँ भारतीय सेनाले स्थायी अखडा बनाउँदा अहिलेको अवस्था सिर्जना भएको हो ।’ उनले कालापानी र लिपुलेकबारे नेपाल र भारतबीचको विवाद पुरानो भएको उनको भनाई थियो ।

‘दुवै देशका सरकारले यसको समाधानका लागि ढिलाई गरेका छन्,’ उनले भनेका छन् । भारतले हेपाहा व्यवहार गरिरहे नेपाल कतै ढल्किन बाध्य हुने अवस्था आउने बताए ।

‘नेपाल चीनतर्फ ढल्किरहेको भारतले सोचेको छ,’ उनले भने, ‘दुवै छिमेकी राष्ट्र हुन्, चीन र भारत । भारतले सधैँ यस्तो व्यवहार गरेमा नेपालले सहयोगको लागि कतै न कतै हात फैलाउनुपर्ने अवस्था आउँछ ।’