एजेन्सी, जेठ १०-प्रसिद्ध अर्थशास्त्री प्राध्यापक नुरियल रुबिनीले कोरोना भाइरसको महामारीको असर विश्वको अर्थतन्त्रमा १० वर्षसम्म पर्नसक्ने चेतावनी दिएका छन् ।

उनले कोरोना भाइरसका कारण विश्वभर लामो आर्थिक मन्दी हुने र त्यसबाट अर्थतन्त्रलाई पुरानै मार्गमा फर्काउन लामो समय लाग्ने उनको भविष्यवाणी छ ।

दुःखी बनाउने भविष्यवाणीका लागि चिनिएका प्राध्यापक रुबिनीले महामारीका कारण गुमेका केही जागिरहरू कहिल्यै नफर्कने बताएका छन् । यसवर्ष कोरोना भाइरसको प्रभावबाट विश्वव्यापी अर्थतन्त्रमा सुधार आए पनि यसको असर लामो समय देखिने उनको भनाइ छ ।

‘अभूतपूर्व’ आर्थिक मन्दीको चेतावनी दिएका प्राध्यापक रुबिनीले सबैभन्दा पहिले सन् २००८ मा विश्वव्यापी आर्थिक संकट आउने भविष्यवाणी गरेका थिए ।

‘सन् २००८ मा ३ वर्ष लागेको थियो,’ उनले बीबीसीको टकिङ एशिया कार्यक्रमा न्यूयोर्कस्थित आवासबाट भने, ‘तर यो पटक तीन वर्ष लागेन, तीन महिना पनि लागेन । तीन हप्तामै सबै ध्वस्त भयो ।’