विराटनगर, ६ जेठ-प्रदेश १ मंगलबार मध्यान्नसम्म ११ जना कोभिड १९ का संक्रमित थपिएका छन् । झापाका ९ जना र सुनसरीका २ जनामा संक्रमण पुष्टि भएको हो । योसँगै प्रदेशमा संक्रमितको संख्या ५४ पुगेको छ ।

झापाको कचनकवल गाउँपालिकाका ९ जनामा संक्रमण पुष्टि भएको विराटनगरस्थित कोसी अस्पतालकी मेडिकल सुपरिटेण्डेन्ट डा. संगिता मिश्राले जानकारी दिइन् । विराटनगरस्थित प्रादेशिक अस्पतालको प्रयोगशालामा उनीहरूको परीक्षण भएको थियो ।

सुनसरीका २ जनाको धरानमा परीक्षण गरिएको थियो । धरानस्थित विपी कोईरला स्वास्थ्य विज्ञान प्रतिष्ठानको प्रयोगशालमा गरिएको परीक्षणमा इटहरीका १८ वर्षीय युवा र पश्चिम कुशाहमा खटिएका १ सुरक्षाकर्मीमा कोरोना देखिएको जनाइएको छ ।

प्रदेश १ मा ७ जिल्लामा संक्रमित देखिएका छन् । उदयपुरमा ३३, झापामा १२, मोरङमा ३, सुनसरीमा ३, खोटाङमा १, धनकुटा र भोजपुरमा १/१ जना संक्रमित देखिएको प्रदेश १ सामाजिक विकास मन्त्रालयले जनाएको छ ।

संक्रमितमध्ये १८ जना डिस्चार्ज भएका छन् । डिस्चार्ज हुनेमा उदयपुरका १५, झापाका २ र भोजपुरका १ जना छन् । डिस्चार्ज भएका ७ जना भारतीय नागरिक हुन् । उनीहरूलाई उदयपुरमा संक्रमण देखिएको थियो ।