काठमाडौं, जेठ ५-नेपाली सेनाले चीनबाट ल्याउने स्वास्थ्य सामग्री लिन आज चार्टर्ड विमान चीन जाने भएको छ । चीनको ग्वान्जाओबाट स्वास्थ्य समाग्री ल्याउन नेपाल एयरलान्सको वाइडवडी जहाज सोमबार बेलुकी चीन जाने लागेको हो ।

चीनबाट स्वास्थ्य समाग्री लोड गरेर मंगलबार बिहान जहाज नेपाल फर्किनेछ । वाइडबडी जहाजमार्फत १८ टन मेडिकल सामग्री ल्याइने र त्यसको सबै प्रक्रिया पूरा भएको सैनिक प्रवक्ता सहायक रथी विज्ञानदेव पाण्डेले बताए ।

यसअघि सेनाले ग्वान्जाओबाट १० वटा कन्टेनर मार्फत ९ टन स्वास्थ्य समाग्री काठमाडौं ल्याइसकेको छ । ग्वान्जाओबाट १३ दिन लगाएर सेनाले शनिबारमात्रै स्वास्थ्य समाग्री काठमाडौं ल्याएको थियो ।

यसअघि २३ वैशाखमा चार्टर्ड जहाज पठाउने तयारी गरेको सेनाले स्वास्थ्य समग्रीको भन्सार प्रक्रिया ढिलाहुँदा चार्टर्ड जहाज पठाउन सकेको थिएन ।

सेनाले खरिद गरेको मेडिकल सामाग्री ल्याउन ठेक्का फ्ल्यास फ्रेट लजिस्टिकले पाएको छ । सेनाले चिनियाँ कम्पनी सिनोफार्म इन्टरनेसनलसँग २ अर्ब २५ करोड रुपैयाँको स्वास्थ्य समाग्री खरिद गरेको छ ।

जस अन्तर्गत स्वास्थ्य सामग्री (पीपीई), एन ९५ मास्कलगायतका ३ सय ४२ टन स्वास्थ्य सामग्री छन् । त्यसरी नै सेनाले भारतीय कम्पनी बीपीपीआईसँग समेत औषधी खरिदको लागि २१ वैशाखमा १ करोड ५० लाखको खरिद सम्झौता गरिसकेको छ ।

१६ चैतमा सरकारले सेनालाई कोरोना भाइरस (कोभिड–१९) को रोकथामका लागि आवश्यक औषधिदेखि अन्य स्वास्थ्य सामग्री ल्याउने जिम्मा सेनाले पाएको थियो । जीटुजी प्रक्रियमा जादाँ स्वास्थ्य समाग्री ल्याउन केही समय ढिला भएको सैनिक मुख्यालयको भनाइ छ ।