जनकपुर, ४ जेठ-धनुषामा कोरोना संक्रमण देखिएका २ जना चितवनबाट जनकपुरधाम आएको खुलेको छ । दुबै संक्रमित ओभरसियर पढ्ने विद्यार्थी हुन् । उनीहरू चितवनबाट साइकल चलाएर धनुषा आएका थिए ।

संक्रमित युवकहरू धनुषाको नगराइन नगरपालिका-९ घोडघास गाउँका बासिन्दा हुन् । उनीहरू अहिले धनुषाको नगराइन नगरपालिकाको गंगुली स्थित प्रादेशिक क्वारेनटाइनमा बसेका छन् । उक्त क्वारेनटाइनका संयोजक सन्तोष ठाकुरका अनुसार संक्रमित व्यक्तिहरू चितवनबाट धनुषा आएका थिए ।

‘क्वारेनटाइनमा समेत साइकल चढेर नै उनीहरू आएका थिए’ संयोजक ठाकुरले भने, ‘उनीहरू चितवनको देवकोटा चोकस्थित आदिकवि भानुभक्त क्याम्पसमा ओभरसियर पढ्ने बिद्यार्थी हुन् ।’

उनका अनुसार संक्रमित युवा लकडाउन हुनुअघि बाहिर कोठा भाडामा लिएर बस्ने गरेका थिए ।  चितवनमा भाडामा बस्दा महोत्तरी र सिरहाका समेत १–१ जना उनीहरूसँग बस्ने गरेका थिए ।

महोत्तरी र सिरहाका ती २ विद्यार्थी भने लकडाउन भएको केही दिनमै गाउँ फर्किएका थिए । उनीहरू घर पुगेर क्वारेनटाइनमा आए वा सिधा क्वारेनटाइनमा गए भन्ने कुराको अनुसन्धान भइरहेको छ । यसविषयमा थप अनुसन्धान भइरहेको स्रयोजक ठाकुरले बताए । उनका अनुसार त्यहाँ क्वारेनटाइनमा समेत ति २ जनालाई कोठा नम्बर १४ मा राखिएको थियो । अन्य मानिसहरूसँग उनीहरूको सम्पर्क हुन नदिइएको संयोजक ठाकुरले बताए ।

क्वारेनटाइनमा आएकै दिन ३० वैशाखमा उनीहरूको स्वाब संकलन गरिएको थियो  । अहिले उनीहरू क्वारेनटाइनमा नै रहेको भए पनि थप उपचारका लागि प्रादेशिक अस्पताल जनकपुरको कोभिड बिशेष अस्पतालमा पठाउने तयारी गरिएको छ  ।

यसअघि स्वास्थ्य तथा जनसंख्या मन्त्रालयले विज्ञप्ति जारी गरेर धनुषाका २० बर्षीय र ६५ बर्षीय पुरुषमा कोरोना संक्रमण पुष्टि गरेका छन् । तर, उनीहरू मध्ये १ जनाको उमेर ६५ वर्ष नभएर ३५ वर्षको रहेको खुलेको छ ।

धनुषामा अहिलेसम्म ५ जनामा कोरोना पुष्टि भइसकेको छ । यसअघि जनकपुरधाम २ का १ जना पत्रकार र मिथिला नगरपालिकाका-२ का १ महिलामा कोरोना संक्रमण पुष्टि भएको थियो । महोत्तरीका १ संक्रमित पनि जनकपुरधाममै पुस्तक व्यवसाय गर्दै आएका थिए ।