काठमाडौं, ३ जेठ-ललितपुरको महालक्ष्मी नगरपालिकाले रेड जोनका जिल्लाबाट आएका व्यक्तिहरूको कोरोना भाइरस (कोभिड-१९) परीक्षण गर्ने भएको छ । नगरपालिकाले एक जरुरी सूचना जारी गर्दै यसबारेमा जानकारी दिएको हो ।

नगरकालिकाले ४ र ५ जेठमा उक्त परीक्षण गरिने पनि जनाएको छ । नगरपालिकाको अनुरोधमा स्वास्थ्य कार्याल ललितपुरमार्पत ५०० जनाको कोभिड-१९ परीक्षण गर्न लागिएको नगर प्रमुख रामेश्वर श्रेष्ठले बताए ।

उनका अनुसार कोभिड-१९ जोखिमको सूचीमा परेका जिल्लाबाट आएका व्यक्ति, फोहोर व्यवस्थापनमा खटिने श्रमिक, विदेशबाट आएका व्यक्तिहरूको परीक्षण गर्न लागिएको हो । नगरपालिकाले तोकिएको मितिमा इमाडो स्वास्थ्य चौकी र लुभु प्राथमिक स्वास्थ्य केन्द्रमा सम्पर्क राख्ने आग्रह गरेको छ ।