तेहरान, पुस २७–इरानी सेनाको मिसाइलबाट युक्रेनी विमान दुर्घटना भएको स्वीकार गरेसँगै इरानमा सरकारविरुद्ध प्रदर्शन सुरु भएको छ । रानीका नागरिकले पहिला आफ्नो हात नभएको भन्दै दाबीप्रति असुन्तुष्टि जनाएका छन् । विमान दुर्घटनामा इरानी सेनाको हात नभएको भन्दै सुरुवातीमा बयान दिने अधिकारीविरुद्ध प्रदर्शन भइरहेको छ । तेहरानका दुई विश्वविद्यालय बाहिर प्रदर्शन भड्किएको स्थानीय सञ्चार माध्यमले जनाएका छन् । प्रदशनकारीमाथि अंकुश लगाउन प्रहरीले अश्रुग्यास प्रहार गरेको छ । यता अमेरिकी राष्ट्रपति डोनाल्ड ट्रम्पले प्रदर्शनको समर्थन गरेका छन् । ट्वीट गर्दै ट्रम्पले नागरिकको प्रदर्शन स्वभाविक भएको बताएका छन् ।

विमान दुर्घटनाको तीन दिनपछि शनिबार इरानले युक्रेनी विमान दुर्घटना भुलवस सेनाको मिसाइलबाट भएको स्वीकारेको थियो । दुर्घटनामा १७६ यात्रुको मृत्यु भएको थियो । तेहरानबाट सार्वजनिक खबर अनुसार शरीफ र आमिर काविर विश्वविद्यालय बाहिर प्रदर्शनकारी जम्मा भएका छन् । पहिला मृतकको यादमा मानिसहरु जम्मा भएको बताइएको थियो । तर शनिबार साँझदेखि प्रदर्शनले उग्र रुप लिएको थियो । इरानको फास समाचार एजेन्सीले विरोध प्रदर्शनको खबर सार्वजनिक गरेको छ । सरकारी सञ्चारमाध्यमले भने एक हजार बढी नागरिकले सरकारविरुद्ध प्रदर्शन भइरहेको खबर सार्वजनिक गरेको छ ।

प्रदर्शनमा विद्यार्थीको सहभागी बढी देखिएको छ । विमानमा आक्रमण गर्ने सरकारी अधिकारीविरुद्ध कारबाहीको माग गरिएको छ । विद्यार्थीले नारा लगाउँदै सर्वाेच्व नेता कमान्डर इन चीफ अयतोल्लाह अली खमेनेइको राजनीनामा र गलत खबर दिने अधिकारीलाई फाँसीको माग गरेका छन् । समाचार अनुसार प्रहरीले प्रदर्शनकारीविरुद्ध कारबाही थालेको छ । सामाजिक सञ्जालमा प्रहरीले अश्रुग्यास प्रहार गरेर प्रदर्शनकारीलाई तिरवितर गरेको भिडियो भाइरल बनेको छ ।