काठमाडौं, ३ जेठ-नेपाल कम्युनिष्ट पार्टी (नेकपा) का केन्द्रीय सदस्य विष्णु रिजालले दासढुंगा हत्याकाण्डको छानविन अहिले नभए कहिल हुन्छ भन्दै प्रश्न गरेका छन् । मदन-आश्रितको २७ औँ स्मृति दिवसको अवसरमा आज ट्विट गर्दै उनले यस्तो प्रश्न गरेका हुन् ।

न्यायालयमा नेकपाको बाहुल्य रहेको भन्दै नेता रिजालले अब घटनाको छानविन हुनुपर्ने मागसमेत गरेका छन् । ‘मानिसहरू प्रश्न गर्दैछन्, ‘दासढुंगा हत्याकाण्डको छानविन अब पनि नभए कहिले हुन्छ ?’ उनले ट्विटमा भनेका छन्, ‘हुन पनि हो राष्ट्रपति हाम्रै, सरकार हाम्रै, संसद् हाम्रै, न्यायालयमा पनि ‘हाम्रै’ बाहुल्य ।  तर, पनि मदन-आश्रितका हत्यारा पत्ता लाग्दैनन् भने कहिले लाग्छन् ? समाजवादसम्म त निकै ढिला भइसक्ने छ कमरेड !’

३ जेठ २०५० मा त्रिशूलीमा भएको जीप दुर्घटनामा मदन–आश्रितको मृत्यु भएको थियो । सो घटना अहिलेसम्म पनि रहस्यमय घटनाकारूपमा लिइएको छ ।