विराटनगरमा ६ वडाको मतगणना सकियो, तीन वटामा एमालेको जित - News Birat

विराटनगरमा ६ वडाको मतगणना सकियो, तीन वटामा एमालेको जित

न्यूज विराट

विराटनगर, ३ वैशाख । विराटनगरमा हालसम्म ६ वटा वडाको मतगणना सम्पन्न भएको छ । हालसम्म वराटनगर महानगरपालिकाका वडा नम्बर १, २, १६, १७, १८ र १९ नम्बर वडाको मतगणना सम्पन्न भएको हो ।

ती वडाको मतगणना सम्पन्न हुँदा सार्वजानिक भएको अन्तिम परिणाम अनुसार एमालले तीन, काँग्रेस, जसपा र स्वतन्त्र उम्मेदवारले १÷१ वडा जितेका छन् ।

अन्तिम मत परिणाम अनुसार विराटनगर–१ को वडाअध्यक्षमा एमालेका काजिबहादुर बस्नेत १९०० मत ल्याएर विजयी भएका छन् । उनका निकटतम प्रतिद्वन्धी काँग्रेसका राजन नेउपानेले १५९१ मत ल्याए ।

त्यस्तै विराटनगर–२ को वडाअध्यक्षमा पनि एमालेका कुमार पोखरेल निर्वाचित भएका छन् । उनले राप्रपाका उम्मेदवार पवन कुमार सुरनालाई पराजित गरे ।

पोखरेलले १३३४ मत ल्याएर विजयी हुदा सुरानाले १२८३ मत पाए । निवर्तमान वडाअध्यक्ष समेत रहेका पोखरेलले अघिल्लो स्थानिय तहको निर्वाचनमा पनि सुरनालाई जितेका थिए ।

विराटनगर १६ नम्बर वडामा नेपाली काँग्रेसका उम्मेदवार उद्धब भूजेलले ७५२ मत ल्याएर वडाअध्यक्षमा निर्वाचित भएका छन् । उनका निकटतम प्रतिद्वन्द्वी एमालेका कुमार हमर्जनले ६८५ मत ल्याएका छन् ।

विराटनगर १७ मा जसपाका उम्मेदवार समिम कमर र विराटनगर १९ मा एमालेका उम्मेदवार श्याम घिमिरे वडाअध्यक्षमा विजयी भए । जसपाका कमरले १ हजार ४ सय ५० मत ल्याएर निर्वाचित भएका छन् । उनका निकटतम प्रतिद्धन्द्धी नेपाली काँग्रेसका असलम आलमले ९४५ मत ल्याए । कमरले प्रतिस्पर्धी आलमलाई ५ सय ५ मत अन्तरले पछि पारेका हुन् ।

विराटनगर १९ मा एमालेका श्याम घिमिरेले ९८७ मत ल्याएर वडाअध्यक्षमा निर्वाचित भएका छन् । उनका निकटतम प्रतिद्वन्दी नेपाली कांग्रेसका उदय राजबंशीले ९०५ मत पाए ।

विराटनगर १८ को वडाअध्यक्षमा स्वतन्त्र उम्मेदवार जितेन्द्र कुमार साह विजयी भएका छन् । ७१६ मत ल्याएर साहले वडाअध्यक्षमा जितेका हुन् । जसपाले टिकट नदिएपछि साहले स्वतन्त्रबाट ‘लालटिन’ चुनाव चिन्ह लिएर उठेका थिए ।

विराटनगर महानगरपालिकाको पछिल्लो मत परिणाम अनुसार नेपाली कांग्रेसका मेयर उम्मेदवार नागेश कोइरालाले लगातार मतान्तर बढाउँदै लगेका छन् । केहीबेर अगाडी सार्बजनिक मत परिणाम अनुसार कोइरालाले ८४७० मत प्राप्त गर्दा उनका निकटतम प्रतिद्वन्दी एमालेका सागर थापा ६२४१ मतसहित पछ्याई रहेका छन् । स्वतन्त्र उम्मेदवार उमेश यादवले २४९० मत ल्याउँदा राप्रापाका प्रल्हाद साहले १६०२ मत प्राप्त गरेका छन् ।

उपमेयरमा भने एमालेकी शिल्पा कार्कीले फराकिलो मतान्तर बनाएकी छिन् । उनले ७१११ मत ल्याउँदा जसपाका अमरेन्द्र यादवले ४६४५ मत प्राप्त गरेका छन् । स्वतन्त्र उम्मेदवार नमिता न्यौपानेले १५८४ मत ल्याउँदा राप्रपाकी विन्दा लुइटेलले १९९१ मत ल्याएको मुख्य निर्वाचन अधिकृतको कार्यालयले जनाएको छ ।

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles