ललितपुर, ३ जेठ-ललितपुरको कोन्ज्योसोम गाउँपालिकामा गरिएको कोरोना परीक्षणमा २ जनाको नतिजा पोजिटिभ देखिएको छ । शुक्रबार १ सय ३६ जनामा गरिएको आरडीटीमा २ महिलाको नतिजा पोजिटिभ देखिएको हो ।

जिल्ला जनस्वास्थ्य कार्यालय प्रमुख डा. खगेश्वर गेलालका अनुसार पोजिटिभ देखिएका ३० र ३२ वर्षीया महिला रहेका छन् । उनीहरूलाई क्वारेन्टाइनमा बस्न आग्रह गरिएको उनले बताए । ‘६० जनाको पीसीआर परीक्षणका लागि नमुना संकलन गरी टेकुस्थित जनस्वास्थ्य प्रयोगशाला पठाइएको छ’ डा. गेलालले भने ।

शुक्रबार यहाँका १३६ जना (पुरुष ७६ जना र महिला ६०) को आरडीटी र ६० जना (पुरुष ४१ र महिला १९) जनाको पीसीआर परीक्षण गरिएको थियो ।

ललितपुरमा शुक्रबारबाट समुदाय स्तरको संक्रमण अवस्था पत्ता लगाउन जनसम्पर्क बढी हुने व्यक्तिहरू, जनप्रतिनिधि, कर्मचारी, सुरक्षाकर्मी, स्वास्थ्यकर्मी, सञ्चारकर्मी लगायतको स्वास्थ्य परीक्षण गर्ने कार्यक्रम रहेको उनले बताए ।