बुटवल, १ जेठ-कोरोना भाइरसका कारण नेपाल फर्कने युवालाई लक्षित गर्दै प्रदेश ५ सरकारले कोभिड-१९ विशेष कृषि कार्यक्रम सञ्चालन गर्ने निर्णय गरेको छ ।

बिहीबार बसेको मन्त्रिपरिषद्को निर्णयले प्रदेशका १ सय ९ वटै स्थानीय तहमा लागू गर्ने गरी कृषि विशेष कार्यक्रम सञ्चालन गर्ने निर्णय गरेको हो । उक्त कार्यक्रमका लागि ५१ करोड १४ लाख रुपैयाँ बजेट विनियाेजन गरिएकाे छ । साउन मसान्तसम्म खर्च गर्ने गरी साे कार्यक्रम बनाइएको हाे ।

प्रदेश सरकारले कृषि एम्बुलेन्स परिचालनका लागि ३४ लाख रुपैयाँ विनियोजन गरेको छ । त्यस्तै, गुल्मी, प्युठान, रुकुम र रोल्पामा बेमौसमी आलु उत्पादन कार्यक्रम सञ्चालन गर्ने र त्यसका लागि १ करोड २० लाख रुपैयाँ खर्च हुनेछ । यसबाट ५ सय किसान लाभान्वित हुन र प्रति रोपनी ६ हजार रुपैयाँको दरले अनुदान दिने निर्णय बैठकले गरेको छ ।

व्यावसायिक तरकारी खेतीका लागिका लागि १४ करोड रुपैयाँ खर्च हुने, विदेशबाट फर्केका र व्यावसायिक खेती उन्मुख प्रोत्साहन कार्यक्रमका लागि २१ करोड ८० लाख खर्च गर्ने निर्णय बैठकले गरेको मुख्यमन्त्रीका प्रेस सल्लाहकार शेरबहादुर केसीले जानकारी दिए ।