काठमाडौं, ३१ वैशाख-बालुवाटारमा भएको सर्वदलीय बैठकमा प्रमुख प्रतिपक्ष दल नेपाली कांग्रेसका सभापति शेरबहादुर देउवाले भारतसँगको सिमाविवादमा सरकारले पहल गर्न सुझाव दिएका छन् ।

उनले आज भएको छलफलमा सुगौली सन्धिमा जुन कुरा प्रष्ट छ त्यहि हुनुपर्ने बताएका छन् । सभापति देउवाले भने, ‘कालापानी हाम्रो हो । यो हाम्रो पार्टीले पनि भन्दै आएको छ । लिपुलेक त्रिदेशीय नाका हो ।’

बुधवार प्रधानमन्त्री निवास बालुवाटारमा बसेको सर्वदलीय बैठकमा पूर्वप्रधानमन्त्री देउवाले उक्त सुझाव दिएको बताए ।उनले यो संसद अधिवेशनबाट एमसीसी पनि पास हुनुपर्ने बताएका छन् ।

संचारकर्मीसँग कुरा गदै उनले भने, ‘एमसीसी देशको हितमा भएकाले जसरी पनि पास हुनुपर्छ । यदि पूर्ववर्ती सरकारले गरेका निर्णय उल्टाइयो भने अहिलेको सरकारले गरेका निर्णय मान्न बाध्य हुने छैनौँ ।’  विदेशमा अलपत्र परेका नेपालीहरूलाई तत्काल स्वदेश फिर्ता गराउन पनि उनले सुझाव दिएका छन् ।