विराटनगर, ३१ वैशाख-झापाको दमक नगरपालिका– ५, हरिओम कोलिनीको भित्री सडकखण्डमा टिपरको ठक्करबाट  १ साइकलयात्रीको मृत्यु भएको छ ।

बुधबार पश्चिमबाट पूर्वतर्फ जाँदै गरेको को १ ख ५५२४ नम्बरको टिपरले विपरीत दिशाबाट आउँदै गरेको साइकललाई ठक्कर दिँदा साइकलयात्री दमक– १ का १६ वर्षीय शोभित दर्जीको घटनास्थलमा नै मृत्यु भएको हो । घटनास्थलमा खटिए प्रहरीको टोलीले साइकललाई ठक्कर दिने टिपर र चालकलाई नियन्त्रणमा लिएको छ भने अन्य थप अनुसन्धान भइरहेको कार्यालयले जनाएको छ ।

३१ वर्षीय पुरुष मृत फेला

भोजपुरको टेम्केमैयुम गाउँपालिका-५, बनापालाका ३१ वर्षीय ममत राई  बाटोमा मृत अवस्थामा फेला परेका छन् । मंगलबार दिउँसो ४ बजेको समयमा रुमला भन्ने स्थानमा राई मृत अवस्थामा रहेको भन्ने जानकारी पाएलगत्तै जिल्ला प्रहरी कार्यालय भोजपुरबाट अनुसन्धान अधिकृतसहितको टोली खटिई गई कानुनी प्रक्रियाका साथै थप अनुसन्धान भइरहेको प्रदेश प्रहरी कार्यालय विराटनगरले जनाएको छ ।