काठमाडौं, ३१ वैशाख-उपचारपछि निको भएर घर फर्किनेको संख्या ३५ पुगेको छ । आज मात्रै चितवनबाट १ महिला र बुटवलमा उपचाररत १ जना पुरुष डिस्चार्ज भएका छन् ।

‘बुटवलमा उपचाररत २५ वर्षीय पुरुष ११औँ दिनमा र चितवनमा उपचारका क्रममा रहेकी ६३ वर्षीय महिला २६ औँ दिनमा डिस्चार्ज हुनु भएको छ’ स्वास्थ्य तथा जनसंख्या मन्त्रालयका प्रवक्ता डा. विकास देवकोटाले भने, ‘यसरी डिस्चार्ज हुने संख्या ३५ पुगेको छ ।’

बुधबार थप २ जनामा कोरोना संक्रमण देखिएको छ । प्रवक्ता देवकोटाका अनुसार नयाँ संक्रमण देखिनेमा बाँकेका ३६ वर्षिय पुरुष र कपिलवस्तुका २२ वर्षिय पुरुषमा संक्रमण देखिएको हो । बाँकेका पुरुषको धुलिखेल, कपिलवस्तुको पुरुषको टेकुमा पिसिआर परीक्षण रिपोर्ट पोजेटिभ आएको हो ।

योसँगै नेपालमा संक्रमितको संख्या २ सय १९ पुगेको छ । जसमा १ सय ७६ जना पुरुष र ४३ महिला रहेका छन् । कोरोनाबाट सबैभन्दा बढी प्रदेश नम्बर २ प्रभावित भएको छ । त्यहाँ ९६ जनामा संक्रमण देखिएको छ ।