धनगढी, ३१ वैशाख-बर्दियाकी कोरोना भाइरस संक्रमित बालिकाको सम्पर्कमा रहेका कैलालीका १ सय १ जनाको स्वाब संकलन गरिएको छ ।बर्दियाको राजापुर नगरपालिका-५ की ११ बर्षिया बालिकामा कोरोना पुष्टि भएपछि उनको सम्पर्कमा आएकाहरूको मंगलबार स्वाब परीक्षण गरिएको हो ।

कैलालीका प्रमुख जिल्ला अधिकारी यज्ञराज बोहराले बालिकाको सम्पर्कमा रहेका गोदावरी नगरपालिका-८ मजगाउँमा ९६ र भजनीका ५ गरी १ सय १ जनाको स्वाब संंकलन गरिएको बताए ।

बालिका बसेको घर लगायत त्यो परिवारको सम्पर्कमा आएकाहरूको स्वाब संकलन गरिएको गोदावरी नगरपालिकाका मेयर हरिसिंह साउँदले जानकारी दिए ।

२१ घरधुरी रहेको सो क्षेत्रबाट १ सय ३० जनाको स्वाब संकलन गरिने भने पनि भीटीएम अपुग भएका कारण मंगलबार ९६ जनाको मात्रै स्वाब संकलन गरिएको प्रजिअ बोहराले जानकारी दिए ।

बुधबार धनगढीबाट थप भीटीएम लिएर स्वाब संकलन गरिने उनले बताए । संकलित स्वाब परीक्षणका लागि सेती प्रादेशिक अस्पताल पठाइएको छ ।

कैलालीबाट बर्दिया पुगेकी ११ वर्षीय बालिकामा कोरोना पुष्टि भएपछि उनी बसेको मजगाउँ सिल नै गरिएको छ । ५ चैत्र आफ्नो हजुरआमासँग मजगाउँ गएकी बालिकामा सोमबार कोराना पुष्टि भएको हो ।

बालिका त्यहाँ करिब ३७ दिन बसेर १२ वैशाख कैलालीकै भजनी मामा घरमा बसेको खुलेको छ । १६ गते बर्दिया गएपछि उनमा सोमबार कोरोना पुष्टि भएको थियो ।