काठमाडौं, ३१ वैशाख-सत्तारूढ दल नेपाल कम्युनिस्ट पार्टी (नेकपा)को स्थायी समिति बैठक आज बस्दै छ ।  बैठक बुधबार बिहान ११ बजे पार्टी कार्यालय धुम्बाराहीमा बस्न लागेको स्थायी समिति सदस्य मणि थापाले जानकारी दिए ।

बैठकका लागि अध्यक्षद्वय ओली र प्रचण्डले कोरोना, सीमा समस्या, नीति तथा कार्यक्रम र बजेटका विषयमा छलफल गर्ने गरी एजेन्डा तय गरेका बताइएको छ ।

सरकारले नीति तथा कार्यक्रम ल्याउनुभन्दा २ दिनअघि नेकपाले स्थायी कमिटी बैठक बोलाएको हो । २ जेठमा सरकारले संसदमा नीति तथा कार्यक्रम पेस गर्दैछ ।

यसअघि २५ वैशाखमा बस्ने भनिएको बैठक अन्तिम समयमा स्थगित गरिएको थियो । २४ गते सचिवालय बैठक चलिरहेका बेला प्रधानमन्त्री ओली बीचमै उठेर हिँडेपछि स्थायी कमिटी बैठक अनिश्चित बनेको थियो ।

त्यसपछि २ अध्यक्षबीच पटकपटक छलफल भएको थियो । स्रोतका अनुसार सोमबार २ अध्यक्षबीच भएको छलफलमा स्थायी कमिटी बैठक बोलाउने सहमति बनेको हो ।