काठमाडाैं, २८ वैशाख-आइतबारदेखि काठमाडौं उपत्यकामा सवारी साधनका लागि ‘टाइम कार्ड’ लागू गरिएको छ । सरकारले अत्यावश्यक कामका लागि सवारी चल्न दिने निर्णय गरेसँगै आइतबारबाट सवारी साधनमा ‘टाइम कार्ड’ लागू गरिएको हो । सरकारी तथा वित्तीय क्षेत्र सञ्चालन गर्न दिने निर्णय भएपछि सवारीलाई व्यवस्थापन गर्न ‘टाइम कार्ड’ प्रणाली लागू गरिएकाे जानकारी गराइएकाे छ।

महानगरीय ट्राफिक प्रहरी महाशाखाका प्रमुख भीम ढकालले सरकारी सेवा, बैंक तथा वित्तीय क्षेत्र, निर्माण क्षेत्र अत्यावश्यक सामान बोक्ने सवारी व्यवस्थापनका लागि ‘टाइम कार्ड’ प्रणाली लागू भएको बताए ।

ढकालका अनुसार सरकारी कार्यालयका सवारी बिहान ९ देखि साढे १० बजेसम्म कार्यालय गइसक्नुपर्ने र साँझ ५ देखि ६ बजेसम्म फर्किइसक्नुपर्नेछ ।

यस्तै, बैंक तथा वित्तीय संस्थामा काम गर्नेहरू दिउँसो ३ देखि ५ बजेसम्म घर फर्किइसक्नुपर्ने र अन्य अत्यावश्यकीय सामान ढुवानी गर्ने सवारीहरूले बिहान १० बजेभित्र गरिसक्नुपर्ने नियम लागू भएको उनले बताए ।

निर्माण क्षेत्रका सवारीहरूलाई राति ८ बजेदेखि बिहान ६ बजेसम्म सञ्चालन गर्न दिने निर्णय भएको उनले बताए । प्रमुख ढकालले पासबाहक सवारी चालकलाई पासको दुरुपयोग नगर्न आग्रह गरे ।

पासको दुरुपयोग भएको पाइएमा पास थुत्ने र गाडी होल्ड गरिने उनले बताए । विभिन्न उद्योग तथा प्रतिष्ठानले सम्बन्धित नियामक निकायबाट आधिकारिक पत्र लिएर मात्रै सवारी सञ्चालन गर्नुपर्नेछ ।