काठमाडाैं, २८ वैशाख-सरकारले कोरोना भाइरस (कोभिड–१९) जितेर घर फर्केकाहरूलाई सामाजमा सम्मानजनक व्यवहार गर्न आग्रह गरेको छ । आइतबार स्वास्थ्य मन्त्रालयका प्रवक्ता डा. विकास देवकोटाले कोरोना भाइरस निको भएर घर फर्केकालाई कुनै खालको विभेद नगर्न आग्रह गरेका हुन् ।

‘कोरोना जितेर घर फर्किनुभएकाहरूलाई छरछिमेक र समाजले विभेद गर्ने गरेको, घरभन्दा टाढा बस्न दबाब दिएको भन्ने सुन्नमा आएको छ । यस्तो नगरिदिनुहोला । उहाँहरू पूर्णतः कोरोनालाई जितर फर्कनुभएको हो । उहाँहरूलाई सम्मानजनक ढंगले जिउने वातावरण तयार गरिनुपर्छ’, उनले भने ।

डा. देवकोटाले कोरोना निको भएर फर्केकाहरूसँग डराउनु नपर्ने पनि बताए । ‘उहाँहरू निको हुनुभएको हो । उहाँहरूबाट रोग सर्छ भनेर डराउनुपर्दैन । अब उहाँहरूसँग रोग सार्न सक्ने क्षमता छैन’, डा. देवकोटाले भने ।

उनका अनुसार अहिलेसम्म नेपालमा १ सय १० जनामा कोभिड–१९ पुष्टि भएको छ । तीमध्ये ३१ जना निको भएर घर फर्केका छन् । विभिन्न अस्पतालमा उपचाररत ७९ जनाको स्वास्थ्य अवस्था सामान्य रहेको उनले बताए ।