काठमाडौं, २५ वैशाख-शुक्रबारबाट सुरू हुने बजेट अधिवेशनको सम्पूर्ण तयारी पूरा भएको छ । कोरोना भाइरस (कोभिड–१९) कारण उत्पन्न विषम परिस्थितिमा विश्व स्वास्थ्य संगठनले निर्धारण गरेको सबै मापदण्ड पालना गरेर बैठक सञ्चालनका सबै तयारी पूरा भएको हो ।

संघीय संसद सचिवालयले सभामुख अग्निप्रसाद सापकोटालाई सबै सांसदको बसाई व्यबस्थापन, सभाकक्ष, कुर्सी र टेबुल, माइक व्यबस्थापन, सफाई लगायतका सबै तयारी पूरा भएको जानकारी दिए ।

उनले आज अपरान्ह् सभाहलको स्थलगत अवलोकन गरेर तयारीबारे जानकारी लिएका थिए । सभाहलमा विश्व स्वास्थ्य संगठनले तोकेको मापदण्ड अनुसार दूरी कायम गरि सीट प्लान गरिएको छ । हरेक २ सीट खाली गरेर बसाई व्यबस्थापन गरिएको छ ।

संयुक्त सदन बस्दा १ सय जनाको हाराहारीमा सांसदका लागि माथिल्लो हलमा बस्ने व्यबस्था मिलाइएको छ । प्रतिनिधिसभाको एकल बैठक हुँदा ४० जना हाराहारी सांसद माथिल्लो हलमा बस्ने तयारी गरिएको छ ।

यसअघि आज विहान सिंहदरबार स्थित कार्यकक्षमा बसाई व्यबस्थापन लगायतका विषयमा सभामुख सापकोटाले दलका मुख्य सचेतक, प्रमुख सचेतक र सचेतकहरूसँग छलफल गरेका थिए ।

छलफलमा सहभागीले सबै सांसदले कोरोना परिक्षण गराउनुपर्ने, परिक्षण गराउन नपाएका, नभ्याएकाहरूलाई परिक्षण र त्यसको रिपोर्टपछि मात्रै सभाहलमा प्रवेश दिनुपर्ने सुुझाव दिएका थिए ।

संसद बैठक अघि कोरोना भाइरस भए/नभएकोबारे पीसीआर विधिबाट परिक्षण गर्ने कार्यव्यबस्था समितिको निर्णयअनुसार आज संघीय संसद अन्तर्गत ४४१ जनाको थ्रोट स्वाब संकलन गरिएको छ । जसमा १७९ जना प्रतिनिधिसभाका सदस्य, ३३ जना राष्ट्रिय सभाका सदस्य गरी २१२ जना सांसदको स्वाब संकलन गरिएको छ ।

सांसद बाहेक आज कर्मचारी र मर्यादापालक गरी २२९ जनाको स्वाब संकलन गरिएको छ । परीक्षणका लागि ४४१ जनाको स्वाब संकलन गरिएको हो ।

आज स्वाब संकलन गरिएका सबैको रिपोर्ट भोलि आइसक्ने संसद सचिवालय अन्तर्गत स्वास्थ्य इकाइका डा. पुुष्प रिजालले जानकारी दिए । बिहान १० बजेदेखि दिउँसो २ बजेसम्म स्वाब संकलन गरिएको थियो ।

स्वाब संकलन गर्न बाँकी सांसद, संसद भवनमा अनिवार्य उपस्थित हुनुपर्ने सुरक्षाकर्मी र कर्मचारीको परीक्षण शुक्रबार बिहान ८ देखि १० बजेसम्म आइसीसी भवनको लोत्से हलमै स्वाब संकलन गरिने बताइएको छ ।