काठमाडौं, माघ २८–सरकारले नेपाल प्रहरीको २७औँ प्रहरी प्रमुख प्रहरी महानिरीक्षक (आईजीपी)मा प्रहरी नायव महानिरीक्षक (डीआईजी) ठाकुरप्रसाद ज्ञवालीलाई नियुक्त गरेको छ । प्रहरी सेवामा ३० वर्षे सेवा अवधिसम्बन्धी व्यवस्थाका कारण आईजीपी सर्वेन्द्र खनालले आजबाट अनिवार्य अवकास पाएपछि मंगलबार बसेको मन्त्रिपरिषद्को बैठकले ज्ञवालीलाई आईजीपी नियुक्त गरेको हो ।

आईजीपीका दाबेदारका अर्का डीआईजीहरू तारणीप्रसाद लम्साल र सूर्य उपाध्यायलाई पछि पार्दै उनी नेपाल प्रहरीको २७औँ प्रहरी प्रमुख आईजीपी बन्न सफल भएका हुन् । ज्ञवाली २८ असोज २०२२ मा प्युठानको तत्कालीन बारीकोट गाउँ पञ्चायतमा जन्मिएका हुन् । उनले राजनीतिशास्त्रमा स्नातकोत्तर गरेका छन् । ज्ञवालीले २५ असार २०४७ बाट प्रहरी निरीक्षकबाट सेवा सुरु गरेका थिए । सधैँ ‘लो प्रोफाइल’मा रहेर काम गर्ने प्रहरी अधिकारीका रूपमा चिनिन्छन् ज्ञवाली ।

ज्ञवाली १८ वैशाख २०५८ मा प्रहरी नायव उपरीक्षक (डीसएपी), ३ मंसिर २०६६ मा प्रहरी उपरीक्षक (एसपी), २८ असार २०७३ मा वरिष्ठ प्रहरी उपरीक्षक (एसएसपी), २८ असोज २०७५ मा प्रहरी नायव महानिरीक्षक (डीआईजी) र २८ माघ २०७६ मा प्रहरी प्रमुख आईजीपी बन्न सफल भएका छन् । ज्ञवाली यसअघि डीआईजी हुँदा प्रदेश १ प्रहरी प्रमुख थिए । त्यस्तै, ज्ञवालीले प्रहरी उपरीक्षक (एसपी) हुँदा दाङ, बारा र झापा प्रहरी प्रमुखको जिम्मेवारी पाएका थिए ।