एजेन्सी, बैशाख २५-कोरोना भाइरस महामारीबाट पीडित बिरामीको उपचारमा संलग्न ३ जना चिकित्सकले अति कार्यबोझ रहेको भन्दै शंकास्पद रूपमा अस्पतालकाे झ्यालबाट हाम फालेको रसियाका सञ्चारमाध्यमहरूले बताएका छन् ।

ती चिकित्सकमध्ये २ जनाको घटनास्थलमै मृत्यु भएको छ भने १ जनाको गम्भीर अवस्थामा उपचारकै क्रममा मृत्यु भएको थियो । विगत २ साताको अवधिमा भएका यी घटनाहरूको यथार्थ पत्ता लगाउन प्रहरीले अनुसन्धान थालेको छ ।

रसियामा १ दर्जनभन्दा बढी अस्पतालका चिकित्सकहरूले व्यक्तिगत सुरक्षा सामग्री (पीपीई)को अभाव रहेको तथा संक्रमण रोक्ने कार्यविधिमाथि प्रश्न उठाउँदै आएका छन् ।

चिकित्सकहरूलाई सार्वजनिक रूपमा आफ्ना पिरमर्का भन्न रोक लगाइएको र कुनै चिकित्सकले सरकारी आदेशको बेवास्ता गरेमा जागीरबाट हटाइने धम्की दिने गरिएको चिकित्सकको भनाइ छ ।

अस्पतालका झ्यालबाट हामफाल्ने चिकित्सकमध्ये २ जनाले कार्यस्थलका विषयमा विमति राखेका थिए भने तेस्रो व्यक्तिमाथि साथीलाई कोरोना सारेको आरोप लगाइएको थियो । रसियामा सयौँको संख्यामा स्वास्थ्यकर्मीहरू नै कोरोनाभाइरसबाट संक्रमित भएका छन् ।

रसियाको राजधानी मस्कोबाट ५ सय किलोमिटर दक्षिणस्थित भोरोनेज क्षेत्रमा कार्यरत डा.अलेक्जान्डर शुलेपोभको गत २ मेमा आफू कार्यरत अस्पतालको दोस्रो तलाबाट हाम फालेका कारण ज्यान गएको थियो । कोरोना संक्रमित डा. शुलेपोभको त्यही अस्पतालमा उपचार हुँदै थियो ।

पश्चिम साइबेरियाको क्रानोयार्स्क शहरमा २५ अप्रिलमा डा. येलेना नेपोमन्यास्चाया नाम गरेकी चिकित्सकको अस्पतालकै पाँचौँ तलाबाट खसेर ज्यान गयो । उनको १ मेमा अस्पतालको सघन उपचार कक्षमा उपचारकै क्रममा मृत्यु भएको थियो ।

त्यस्तै, २४ अप्रिलमा मस्कोस्थित १ अस्पतालको झ्यालबाट खसेर डा. नताल्या लेभेदेभाको मृत्यु भयो । अस्पतालले दुर्घटनावश नताल्याको निधन भएको बताए पनि स्थानीय सञ्चारमाध्यमहरूले डा. नताल्यामाथि कोरोनाभाइरससँग सम्बन्धित तनाव नै मुख्य रूपमा जिम्मेवार रहेकाे बताएका छन् ।