विराटनगर, २५ -वैशाख-प्रदेश १ का मुख्यमन्त्री शेरधन राईले बुद्ध जयन्ती तथा किराँत समुदायको उँभौली पर्वको अवसरमा शुभकामना व्यक्त गरेका छन् ।

आज एक शुभकामना सन्देश जारी गर्दै मुख्यमन्त्री राईले स्वदेश तथा विदेशमा रहेका सम्पूर्ण सुख, शान्ति, समृद्धि एवं उत्तरोत्तर प्रगतिको लागि शुभकामना व्यक्त गरेका हुन् ।

‘विश्व शान्तिका अग्रदूत गौतम बुद्धका उपदेशहरू विश्वमै लोकप्रिय रहेका छन् । शान्ति, अहिंसाका प्रतिमूर्ति गौतम बुद्धबाट व्यक्त सत्य वचनहरूको महत्व आजको विश्व परिवेशमा झनै बढेको छ’ मुख्यमन्त्री राईद्वारा जारी सन्देशमा भनिएको छ, ‘बुद्धको उपदेशलाई आत्मसात गर्न सके राष्ट्र र विश्वमा नै बन्धुत्व, सद्भाव र दिगो शान्तीको स्थापना हुने मेरो विश्वास छ ।’

त्यस्तै, उनले उँभौली जस्ता चाडपर्वले भौगोलिक, धार्मिक, सांस्कृतिक जातिय र भाषिक विविधतालाई आपसमा गाँसेर सामाजिक सद्भाव, राष्ट्रिय एकता तथा साझा नेपाली पहिचान कायम गर्नमा महत्वपूर्ण योगदान दिने बताएका छन्

‘हिमाल, पहाड र तराईमा बस्ने सबै नेपालीबीच बन्धुत्व, भाइचारा र एकताको भावना बढाउन यस प्रकारका चाडपर्वले उर्जा प्रदान गर्दै आएको छ ।’ मुख्यमन्त्री राईले भनेका छन्, ‘यस्ता प्रकारका मौलिक सांस्कृतिक चाडपर्वहरूले सामाजिक एवं पारिवारिक जमघट गराउने र समुदायबीचमा आपसी सद्भाव सुमधुर बनाउन सहयोगसमेत गरेका छन् ।’ मुख्यमन्त्री राईले कोरोना भाइरसबाट जोगिनसमेत सबैलाई अपिल गरेका छन्