काठमाडौं २४ वैशाख-जिल्ला प्रशासन कार्यालय, काठमाडौंका प्रमुख जिल्ला अधिकारी जनकराज दाहाल, महानगरीय ट्राफिक प्रहरी महाशाखाका प्रमुख प्रहरी वरिष्ठ उपरीक्षक भीमप्रसाद ढकाल, नेपाल प्रहरी, नेपाली सेना र सशस्त्र प्रहरीको टोलीले काठमाडौं उपत्यका भित्रिने मुड्खु, नागढुङ्गा, साँखु, जगाती, भीमढुङ्गा नाकाहरूको अनुगमन गरेको छ । काठमाडौं उपत्यका भित्रिने सवारी साधन र मानिसको आवागमनको विषयमा वस्तुस्थिति बुझ्न, नाकामा हुने चेकजाँच कडाई गर्नका लागि अनुगमन तथा निरीक्षण गरिको जनाइएको छ ।

काठमाडौं बाहिरबाट उपत्यकाभित्र धमाधम मानिसहरू लुकेर आउन थालेको खबर आएपछि वास्तविकता बुझ्न स्थलगत अनुगमनमा गएको ट्राफिक प्रहरी महाशाखाका एसएसपी भीम ढकालले बताए ।

उनले भने, ‘अत्यावश्यक मालबाहक सवारीहरूमा मानिसहरू लुकेर काठमाडौं आइरहेका छन् भन्ने सूचना मलाई आएको थियो । वास्तविकता के रहेछ भनेर आजसम्ममा हामी सबै नाकाहरूमा गयौँ । हामीले नाकाहरूमा तीन-चार घण्टा पनि बितायौँ तर त्यस्तो पाइएन ।’

टोलीले एक हप्तामा अनुगमन गरेको  हो । उनले रातारात मान्छे काठमाडौं भित्रिए भनेर आएको खबर जस्तो डरलाग्नो अवस्था नरहेको उनले बताए । ढकालले भने, ‘नाकाहरूबाट उपत्यकामा आवश्यक पर्ने खाद्यवस्तु, तरकारी ढुवानी गर्ने, पेट्रोलियम बस्तु ढुवानी गर्ने र बिरामी बोकेका एम्बुलेन्स मात्रै भित्रिँदै गरेका भेट्यौं । ती गाडीहरूमा चालक र सहचालक मात्र थिए ।’