विराटनगर, बैशाख २२–विराटनगरका व्यवसायीहरुले ६ हप्तादेखि जारी बन्दा बन्दीको बिकल्प खोज्न सरकारसँग माग गरेका छन् । विश्वव्यापी महामारीका रुपमा फैलिएको कोरोना भाइरस(कोभिड–१९) संक्रमणको जोखिम न्युनिकरणका लागि सरकारले गत चैत ११ गतेदेखि जारी गरेको बन्दा बन्दीका कारण लघु, घरेलु तथा साना उद्योग व्यवसाय क्षेत्रमा गम्भिर संकट उत्पन्न भएको भन्दै विकल्प खोज्न माग गरेका हुन्।

विराटनरस्थित सुनकोशी फर्निचर उद्योगका सञ्चालक, विराट व्यापार संघका पूर्व उप–महासचिव र नेपाल घरेलु तथा साना उद्योग महासंघ मोरङ जिल्ला कार्यसमिति सदस्य एकराज ढकालले बन्दा बन्दीको विकल्प खोजेर सुरक्षितरुपमा सामाजिक दुरी कायम गरि पशल तथा व्यापार व्यवसाय सञ्चालनको व्यवस्था गर्न माग गरेका छन् ।

समाजिक सञ्जाल फेसबुकमा स्टाटस लेख्दै उनले बन्दा बन्दीको विकल्प नखोजिए मानिसहरु रोगले भन्दा भोकले मर्ने बताएका छन् । ‘लक डाउनको विकल्प खोजौँ । १० बजेदेखि ५ बजे सम्म भएपनी सामाजिक दुरी कायम गरी पशल व्यापार खोलौँ, नत्र मान्छे कोरोनाले हैन भोक र ऋणले मर्छ ।’ उनले फेसबुकमा लेखेका छन् ।

त्यस्तै ढकालले अर्को स्टाटसमा लेखेका छन्,‘ भाटभटेनी, सेन्टरमल, आरके मल र बैंकमा ४ सय देखि ५ सय सम्म मान्छेको भिड लाग्दा कोरोना संक्रमण नहुने अनि २/४ जना मान्छे आउने साना पसलमा चै कोरोना संक्रमण हुने ? साना पशल किन बन्द? मान्छे कोरोनाले हैन भोकले मर्छ ।’

नेपाल घरेलु तथा साना उद्योग महासंघ मोरङले पनि आइतबार मात्र प्रदेश नं. १ का उद्योग पर्यटन बन तथा वातावरण राज्यमन्त्री विजयकुमार विश्वासलाई भटेर घरेलु तथा साना उद्याग व्यवसायका क्षेत्रमा राहतको प्याकेज ल्याउन माग गर्दै १३ बुँदे ज्ञापन पत्र बुझाएको छ ।

लगातारको बन्दाबन्दीले उद्योग व्यवसायक्षेत्र संकटग्रस्थ अवस्थामा पुगेकाले राहतको प्याकेज ल्याउन माग गर्दै ज्ञापनपत्र बुझाइएको नेपाल घरेलु तथा साना उद्योग महासंघ मोरङका उपाध्यक्ष चेतन निरौलाले जानकारी दिए ।