एजेन्सी, बैशाख २२-कोरोना भाइरसबाट सबैभन्दा बढी प्रभावित इटली, स्पेन र फ्रान्समा पछिल्लो २४ घन्टामा मृत्युदरमा भारी मात्रामा कमी आएको छ । फ्रान्समा १३५, स्पेनमा १६४ इटलीमा १७४ जनाको पछिल्लो २४ घन्टामा मृत्यु भएको छ ।

यसैबीच फ्रान्सका चिकित्सकहरुले कोरोना विरामीको नयाँ नमुनाका आधारमा गत वर्षको जस्तै सामान्य अवस्थामा पुगेको भन्न सकिने दाबी गरेका छन् ।

पेरिसका चिकित्सकका अनुसार २७ डिसेम्बरमा नै कोरोना संक्रमण पाइएको थियो । फ्रान्सले त्यसको केही सातापछि आधिकारिक रुपमा कोरोना भाइरसको पुष्टि गरेको थियो ।

मार्चपछि एक दिनमा १३५ जनाको मृत्यु भएको यो पहिलो तथ्यांक हो । फ्रान्समा ११ मे देखि लगाएको लकडाउन हटाउने तयारी भइरहेको छ ।यसपछि बच्चाहरु विद्यालय जान सक्नेछन् भने केही कारोबार खोल्ने र अनुमति नलिएर पनि एक सय किलोमिटर सम्म जान पाउनेछन् ।

आइतबार फ्रान्सका स्वास्थ्यमन्त्रीले नयाँ संक्रमणमा कति कमी आउँछ त्यसमा नै अन्य कुरा निर्भर हुने बताएका थिए । फ्रान्समा अब ईयू र बेलायतबाट आउनेलाई दुई साता क्वारेन्टाइनमा समेत राखिनेछैन ।

स्पेनमा पछिल्लो २४ घन्टामा १६४ जनाको मृत्यु भएको छ । यो पछिल्लो डेढ महिनाकै कम मृत्यु हो । सात हप्तापछि शनिबार वयस्कलाई पनि घरबाहिर निस्कन दिइएको थियो ।

आजदेखि मानिसहरु सार्वजनिक यातायातमा मास्क लगाएर यात्रा गर्न सक्नेछन् भने केही कारोबार खुला हुनेछन् ।इटलीमा पनि दुई महिनामा सबैभन्दा कम मृत्यु पछिल्लो २४ घन्टामा भएको छ । त्यहाँ १७४ जनाको मृत्यु भएको छ । इटलीमा लकडाउन खुकुलो बनाउने तयारी भइरहेको छ । यद्यपि विद्यालय, सिनेमाघर र सपिङ मल भने बन्द रहनेछन् ।

इटलीमा हालसम्म २८ हजार ८८४ जनाको मृत्यु भइसकेको छ । इटलीमा अमेरिकापछि सबैभन्दा बढी नागरिकको मृत्यु भएको छ । अमेरिकामा ६८ हजार ५९८ जनाको मृत्यु भइसकेको छ ।