विराटनगर, बैशाख २०-विराटनगरको नोबेल मेडिकल कलेज अस्पतालले उदयपुरको भएकै कारण अर्का एक बिरामीको उपचार गर्न इन्कार गरेको छ । यसअघि सुत्केरी महिलाको उपचार गर्न अस्वीकार गरेको अस्पतालले हातको अपरेसनका लागि भर्ना गरिएका एक बिरामीलाई उदयपुर घर भएको भन्दै अपरेसन थिएटरबाट निकालिदिएको हो ।

बिहीबार घाँस काट्ने क्रममा भीरबाट लडेर देब्रे हात भाँचिएका त्रियुगा नगरपालिका–६, घनचक्रेका १६ वर्षीय भीमबहादुर खत्रीलाई नोबेल अस्पताल भर्ना गरिएको थियो ।

अपरेसनकाे तयारी गरेका नोबेल मेडिकल कलेजका डाक्टर प्रकाश सिटौलाले कुहिनोभन्दा माथिको भाग अपरेसन गर्नुपर्ने भन्दै शुल्क र आवश्यक उपकरण तथा औषधि किन्न लगाएका थिए ।

बिरामी भीमबहादुर खत्रीले अपरेसन गर्ने बेलामा आफूलाई ठेगाना सोधेको बताए । उनले भने, ‘मैले घर उदयरपुर हो भनेपछि उहाँले खै कता फोन गर्नुभयो र तिम्रो अपरेसन हुँदैन भन्नुभयो ।’

खत्रीको उपचार गर्ने तयारी गरेका डा. सिटौलाले बिरामीलाई कोरोना परीक्षण गरेर आउनू भनिएको बताए । ‘उदयपुरमा धेरै कोरोना संक्रमित देखिएका छन् । उहाँ त्रियुगा नगरपालिकाकै हुनुहुन्छ । त्यसैले पहिला कोरोना परीक्षण गरेर आउनू भनिएको हो । ज्यानकाे माया सबैलाई हुन्छ’, डा. सिटौलाले भने ।

यसअघि बुधबार नोबेलले उदयपुर गाइघाट घर भई प्रसूतिका लागि भर्ना भएकी महिला २९ वर्षीया सरस्वती रौनियारलाई कोसी अस्पताल रेफर गरेको थियो ।

उदयपुरको त्रियुगा नगरपालिका–३ भुल्केमा पटक–पटक गरी २८ जना कोरोना संक्रमण भेटिएपछि कतिपय अस्पतालले उदयपुरका बिरामीको उपचार नै गर्न अस्वीकार गर्न थालेका छन् ।