काठमाडौं, १५ वैशाख-सत्तारुढ दल नेपाल कम्युनिस्ट पार्टी (नेकपा) मा विवाद बढेपछि अहिले एकएक्लै र सामूहिक छलफल जारी रहेका छन् । आज बिहान बालुवाटारमा अध्यक्ष तथा प्रधानमन्त्री केपी शर्मा ओली र वरिष्ठ नेता माधवकुमार नेपालबीच छलफल भएको थियो ।

छलफलमा प्रधानमन्त्रीले आफू नेपालसँग मिलेर जान तयार रहेको प्रस्ताव गरेको नेपाल निकट १ नेताले बताए । ती नेताले नेपालको भनाइ उद्धृत गदै भने ‘प्रधानमन्त्रीले मिलेर जान आफू तयार रहेको बताएका छन् । तर, नेपाल भने उहाँको कुरामा विश्वस्त हुनुहुन्न । उहाँले अहिलेसम्म पार्टी र सरकारमा एकलौटी ढंगले काम गर्नु भयो । आज उहाँलाई अप्ठेरो पर्‍यो भन्दैमा मिल्ने अवस्था छैन ।’

उक्त छलफलमा खासै केही प्रगति नभएपछि नेताहरू सामूहिक रूपमा वरिष्ठ नेता नेपालको निवास कोटेश्वरमा बैठक बसेका छन् । बालुवाटारमा २ नेताबीच केही निष्कर्ष ननिस्केपछि पुनः ओलीले आफू निकट नेताहरू कोटेश्वर पठाएर छलफल गर्न खोजेका थिए । तर, नेपाल समूहका नेताहरूले आफूहरू पनि छलफलमा बस्ने बताएपछि सामूहिक रुपमा दुवै पक्षका नेताहरू छलफलमा बसेको एक नेताले बताए ।