काठमाडौं, १५ वैशाख-काठमाडौं महानगरपालिकाले कोरोना सङ्क्रमण, रोकथाम तथा नियन्त्रण कोषबाट ठूला, मझौला र साना वडालाई निकासा गरिएको रकम अनुमोदन गरेको छ ।

कोभिड–१९ सङ्क्रमण रोकथाम र नियन्त्रण गर्न कामपाबाट भएको प्रयासको समीक्षा गर्दै आइतबार साँझ बसेको ४५औँ कार्यपालिका बैठकले उक्त रकम अनुमोदन गरेको हो । बैठकले क्रमशः ठूला, मझौला र साना वडालाई निकासा गरिएको १५ लाख, १० लाख र ५ लाख रुपैयाँ अनुमोदन गरेको छ ।

त्यसैगरी फोहोर व्यवस्थापनका लागि प्रयोग हुँदै आएको ककनी गाउँपालिकाकाका प्रभावित वडामा राहतका लागि प्रदान गरिएको १५ लाख रुपैयाँ र धुनिबेँसी नगरपालिकाका–१ का लागि पठाइएको ३ लाख रुपैयाँ बैठकले अनुमोदन गरेको छ ।

बैठकमा कोरोना भाइरसका कारण समस्यामा परेकालाई राहत वितरणमा एकद्वार नीतिअनुरुप वडाबाट काम भएकाले विकृति न्यूनीकरणमा सहज भएको पनि जनाइएको छ ।

महानगरका प्रमुख विद्यासुन्दर शाक्यको अध्यक्षतामा सम्पन्न बैठक कोरोना नियन्त्रणका लागि वडामा पठाइएको बजेट, वडाबाट भएका काम, राहत वितरणका लागि सङ्कलित विवरण, र्‍यापिड डायग्नोस्टिक परीक्षण, राहत वितरण, निःशुल्क भोजन व्यवस्थापनलगायतका विषयमा केन्द्रित थियो ।

महानगर प्रमुख शाक्यले अहिलेसम्ममा महानगरका ६८ हजार ६१७ लाई राहतस्वरुप खाद्यान्न दिइसकिएको उल्लेख गरे । गाउँ फर्कने खान नपाएरभन्दा अन्य कारणले फर्किएका हुनसक्ने उनको भनाइ थियो । कामपाले खान छैन भन्ने १९ हजार ७२३ लाई वडाबाट निःशुल्क भोजनको व्यवस्था गरेको छ ।

लकडाउनकाे अवधिमा उपचार गर्न अस्पताल जाने ३ हजार १९५ बिरामीलाई अस्पताल ल्याउने र घर पुर्‍याउने व्यवस्था पनि कामपाले गरेको छ । नेपाल एम्बुलेन्स सेवाको १०२ बाट २ हजार ६८० ले र एम्बुलेन्स चालक सङ्घबाट ५१५ ले सेवा लिएका छन् । रासस