एजेन्सी, बैशाख १२-साउदी अरबमा ११ जना भारतीय नागरिकको मृत्यु भएको साउदी अरबस्थित भारतीय राजदूतावासले जानकारी गराएको छ । ‘यही बुधबार (अप्रिल २२) सम्म राजदूतावासलाई प्राप्त जानकारीमा साउदी अरबको मदिनामा ४, मक्कामा ३, जेदामा २ गरी ११ भारतीयको कोभिड–१९ को सङ्क्रमणका कारण मृत्यु भएको छ,’ राजदूतावासद्वारा जारी एक विज्ञप्तिमा भनिएको छ ।

‘कोभिड–१९ को सङ्क्रमणबाट सिर्जित सङ्कटका समयमा समय अफवाह फैलाउँदा महामारीका कारण अनावश्यक अशान्ति र पीडा हुने हुँदा शान्त रहन भारतीय समुदायलाई अनुरोध छ,’ राजदूतावासले भनेको छ, ‘सामाजिक सञ्जालले गलत र अपुष्ट सूचनालाई प्रचार गर्नु ठीक होइन र यसका कारण सामुदायिक वैरभाव निम्तिन्छ र यसले नैतिक रूपमा भ्रष्ट वातावरणलाई प्रश्रय दिन्छ ।’

‘प्रधानमन्त्री नरेन्द्र मोदीले भनेजस्ता कोभिड-१९ को सङ्क्रमणले कुनै समुदाय, धर्म, वर्ण, जाती, भाषा, विचार र सीमा नहेर्ने हुँदा हाम्रा प्रतिक्रिया एवम् व्यवहार एकता र सहभ्रातृत्वको श्रेष्ठतासँग गाँसिनु पर्छ,’ विज्ञप्तिमा भनिएको छ ।