काठमाडौं, ११ वैशाख-पाटन अस्पतालमा उपचार गराई रहेका सनसिटी अपार्टमेन्टका २ जना घर फर्किएका छन् । उनीहरू संक्रमण मुक्त भएर घर फर्किएको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले बताए ।

उक्त अपार्टमेन्टमा बस्ने एकै परिवारका ३ जनामा आरडीटी परीक्षणमा पोजेटिभ देखिएको थियो। तर, पीसीर प्रविधिबाट नमूना परीक्षण गर्दा २ जनाको पोजिटिभ र १ को नेगेटिभ रिपोर्ट आएको थियो ।

पाटन अस्पतालको आइसोलेसनमा उपचार गरिएकोमा ८१ वर्षीया महिला र ५८ वर्षीय पुरुष बिहीबार निको भएर घर फर्किएको प्रवक्ता देवकोटाले बताए । उनीहरूमा कोरोना संक्रमण देखिएपछि सनसिटी अपार्टमेन्टमा बस्नेहरूको कोरोना परीक्षण गरिएको थियो। उनीहरूमा कोरोना नेगेटिभ रिपोर्ट आएको थियो ।