पत्रकार विश्वकर्मालाई सम्मान गरिने - News Birat

पत्रकार विश्वकर्मालाई सम्मान गरिने

न्यूज विराट

विराटनगर, २७ मंसिर–मोरङ जिल्लालाई कार्यक्षेत्र बनाएर लामो समयदेखि पत्रकारिता गर्दै आएका सकृय पत्रकार किशोर विश्वकर्मालाई सम्मान गरिने भएको छ । नेपाल घरेलु तथा साना उद्योग महासंघ मोरङले पत्रकार विश्वकर्मालाई सम्मान गर्ने भएको हो । महासंघ मोरङको ११ औं जिल्ला अधिवेशन तथा महिला उद्यम समितिको १९ औं जिल्ला भेलाको अवसर पारेर नगदसहित सम्मान गर्न लागिएको हो ।

करिब डेढ दशकदेखि मोरङ जिल्लालाई कार्यक्षेत्र बनाई प्रदेश १ को राजधानी विराटनगरमा बसेर सकृृय रुपमा निरन्तर कलम चलाउँदै आएका पत्रकार विश्वकर्मालाई आगामी मंसिर २९ गते विराटनगरस्थित इन्द्रेणी पार्टी प्यालेसमा हुने अधिवेशन तथा महिला उद्यम समितिको जिल्ला भेलाको अवसर पारेर सम्मान गर्न लागिएको नेपाल घरेलु तथा साना उद्योग महासंघ मोरङका उपाध्यक्ष चेतन निरौलाले जानकारी दिए।

पत्रकार विश्वकर्माले पत्रकारिता सुरु गरेदेखिनै निरन्तर घरेलु तथा साना उद्योगका समस्या, चुनौती, सम्भावना र महासंघका गतिविधि आफु कार्यरत सञ्चार माध्यममा प्रकाशन तथा प्रसारण गर्दै आएको र पत्रकारिताका माध्यमबाट घरेलु तथा साना उद्योगका क्षेत्रमा उल्लेखनिय योगदान गरेकाले कार्यसमितिको बैठकले सर्वसम्मतरुपमा सम्मान गर्ने निर्णय गरेको उपाध्यक्ष निरौलाले बताए ।

पत्रकार विश्वकर्मा हाल गोरखापत्रमा आवद्ध छन भने र शिलापत्रको प्रदेश १ संयोजक हुन् । नेपाल पत्रकार महासंघ मोरङको २ कार्यकाल कार्य समिति सदस्यको जिम्मेवारी पुरा गरिसकेका पत्रकार विश्वकर्मा राष्ट्रिय दलित पत्रकार संघ मोरङको अध्यक्षसमेत हुन् । रेडीयो, टेलिभिजन, छापा तथा अनलाईन सवै माध्यममा पत्रकारिताको अनुभव बटुलेका विश्वकर्मा झण्डै डेढ दशकदेखि पत्रकारिता क्षेत्रमा सकृयरुपमा कलम चलाउँदै आएका छन् ।

यस अघि पत्रकार विश्वकर्मा लायन्स क्लब अफ विराटनगर एक्टिभ, लायन्स क्लब अफ विराटनगर टंकिसिनुवारी, लायन्स क्लब अफ विराटनगर युनाईटेटबाट संयुक्तरुपमा कदर पत्रबाट सम्मानित भइसकेका छन् । त्यस्तै उनले लायन्स क्लब इन्टरनेशनल डिस्ट्रीक्ट ३२५ ए वानबाट ‘पि एल ओ गु्रप लायन्स सर्वोत्कृष्ट विद्युतीय सञ्चारकर्मी पुरस्कार’ समेत प्राप्त गरिसकेका छन् ।

त्यस्तै अधिवेशनका अवसरमा निवर्तमान अध्यक्ष र पूर्व अध्यक्षहरु, महिला उद्यम समितिका पूर्व अध्यक्षहरु लगायतलाई समेत सम्मान गर्ने कार्यक्रम रहेको उपाध्यक्ष निरौलाले जानकारी दिए ।

तीन÷तीन वर्षमा हुँदै आएको अधिवेशन यसपटक विश्वव्यापी माहामारीको रुपमा फैलिएको कोरोना भाइरस संक्रमणको जोखिमका कारण करिब ८ महिना ढिलो गरि हुन लागेको हो । गत ८ मंसिरमा बसेको महासंघ मोरङको कार्यसमिति बैठकले जिल्ला अधिवेशन तथा महिला उद्यम समितिको जिल्ला भेला स्वास्थ्य मापदण्ड पालना गर्दै मंसिर २९ गते गर्ने निर्णय गरेको थियो ।

अधिवेशनमा मोरङ जिल्लाभरिबाट एक सय जना बढी प्रतिनिधिहरुको सहभागिता रहने जनाइएको छ । अधिवेशनले महासंघको कार्यसमितिका लागि २२ जना र महिला उद्यम समितिका लागी १७ जनाको कार्यसमिति चयन गर्ने महासचिव गोपाल काफ्लेले जानकारी दिए । उनका अनुसार महासंघ मोरङमा ५ सय बढी उद्यमीहरु संगठित रहेका छन् ।

अधिवेशनमा जिल्ला भरिका लघु तथा घरेलु महिला उद्यमीले उत्पादन गरेका अर्गानिक चिया, मह, ताजा तरकारी तथा फलफुल, च्याउ, किवी, लत्ताकपडा, ढाकाका उत्पादन, जुत्ताचप्पल लगायत घरेलु तथा सना उद्योगका उत्पादनहरुको प्रर्दशनीसमेत हुने महासचिव काफ्लेले जानकारी दिए ।

उनले अधिवेशनको उद्घाटन प्रदेश १ का उद्योग, पर्यटन, वन तथा वातावरणमन्त्री जगदिस कुसियतले गर्ने कार्यक्रम रहेको र कोरोना संक्रमणको जोखिमका कारण अनिवार्यरुपमा मास्क स्यानिटाइटरको प्रयोग गर्दै आवश्यक स्वास्थ्य मापदण्ड अनुसार कार्यक्रम आयोजना गरिएको बताए ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles