नेपाली कांग्रेसका युवा नेताले स्थिर सरकारको नारा दिएर सत्तारोहण गरेका वर्तमान प्रधानमन्त्रीसँग अब सरकारमा बसिरहने नैतिक आधार वाँकी नरहेको निश्कर्ष निकालेका छन् ।

उनीहरूले बुधबार संयुक्त प्रेस वक्तव्य जारी गर्दै संविधान बनाउँदा अत्यन्त सुझबुझका साथ राखिएको प्रावधानहरूलाई भत्काएकाले सत्तामा रहने नैतिकता प्रधानमन्त्री केपी ओलीसँग नभएको ठहर गरेका हुन् ।

सरकारले जारी गरेका दुवै अध्यादेशबाट कुनै दल विशेषको विषय वा कानून परिमार्जनको विषयमा मात्र सीमित नभई संविधानले परिकल्पना गरेको सिंगो राजनीतिक व्यवस्थामाथी प्रहार गरेको उनीहरूले दाबी गरेका छन् ।

युवा ११ नेताहरूले वक्तव्यमार्फत् सोधेका छन्, ‘संविधानले व्यवस्था गरेको संवैधानिक परिषदको नियुक्तिको प्रावधानलाई संविधानकै खिलाप हुनेगरी अध्यादेश ल्याउने अधिकार सरकारलाई कसरी भयो ? के मनसुवाका साथ त्यो प्रावधान हटाइयो ?’

उनीहरूले संवैधानिक अंगहरूमा कब्जा गर्ने मनोकांक्षाका साथ कार्यकारी व्यक्तिको चाहना वा निर्णयबाट संवैधानिक निकायको नियुक्ति गर्ने प्रावधानहरूले संवैधानिक निकायको स्वायत्ततामाथिको निर्मम प्रहार, संविधानले व्यवस्था गरेको सन्तुलन र नियन्त्रणको समेत पूर्णत वर्खिलापमा रहेको जनाएका छन् ।

वक्तव्यमा लेखिएको छ, ‘जनताले गरेको वलिदानवाट प्राप्त संविधान न कुनै नेता, गुट वा पार्टी विशेषको सत्ता लिप्साका निम्ति थियो नत यो कुनै व्यक्तिको लहड र सनकको अस्त्र बनाउनका लागि हो ।’

लोकतान्त्र र संविधानमाथी नै प्रहार गर्ने कुत्सित मनसायबाट उत्प्रेरित अध्यादेश सरकारले अबिलम्ब फिर्ता लियोस्, अन्यथा यसविरुद्धको प्रतिरोध आन्दोलनको परिणाम भोग्न तयार रहोस् भन्ने चेतावनी पनि वक्तव्य मार्फत् कांग्रेसका युवा नेताहरुले दिएका छन् ।

सरकारको यो कदममा राष्ट्रपतिको भूमिकालाई अस्वभाविक हतारो र संलग्नता आश्चर्यजनक मात्रै होइन संशयपूर्ण पनि रहेको उनीहरूको ठहर छ ।