राजनीतिक दल र संवैधानिक परिषद्सम्बन्धी अध्यादेशको विरोधमा साझा पार्टीले ‘डिजिटल अभियान’ चलाउने भएको छ । उसले सामाजिक सञ्जाललगायतबाट अध्यादेशप्रति विरोध जनाउने भएको हो । संसदभित्र र बाहिर रहेका दल, नागरिक समाज र आमसर्वसाधारण सबैलाई यस कार्यमा सहयोग गर्न साझा पार्टीले आह्वान गरेको छ ।

पार्टीका सहप्रवक्ता शरदराज पाठकले विज्ञप्ति निकालेर अध्यादेश फिर्ताका लागि सरकारमाथि दबाब बढाउन तीन बुँदे प्रस्ताव अघि सारेका छन् ।

‘राजनीतिक दलसम्बन्धी अध्यादेश निहित स्वार्थपूर्तिका लागि पार्टी फुटाउने कुत्सित मनशायबाट र संवैधानिक परिषद्सम्बन्धी अध्यादेश संवैधानिक निकायमाथि पूर्ण नियन्त्रण कायम गरी राजनीतिक प्रतिशोध साँध्ने ध्येयबाट प्रेरित भएको प्रस्टै देखिन्छ’, विज्ञप्तिमा उल्लेख छ ।

अध्यादेशविरुद्ध दबाब दिन र संघर्ष गर्न संसदमा रहेका र नरहेका इच्छुक सबै दलहरूको संयुक्त मोर्चा निर्माण गर्न उनले प्रस्ताव गरेका छन् । यसैगरी, सुरक्षा प्रोटोकलको व्यवस्था मिलाएर तुरुन्त संघीय संसदको बैठक आह्वान गर्नुपर्नेमा जाेड दिइएकाे छ ।