स्वास्थ्य शिक्षा अभियन्ता डा. गोविन्द केसीले सरकारी गाडीबाट बिरामी बोक्न अपिल गरेका छन् । उनले मंगलबार विज्ञप्ति जारी गर्दै निष्क्रिय रहेका सरकारी गाडीबाट बिरामी बोक्न सम्बन्धित मन्त्रालयलाई अपिल गरेका हुन् ।

उनले भने, ‘सरकारी गाडीहरू अहिले निष्क्रिय रहेका छन् । त्यसैले यातायात सेवा सुचारु नहुन्जेलका लागि ती सरकारी गाडीमा बिरामीलाई अस्पताल ल्याउने विशेष व्यवस्था गर्न सम्बन्धित मन्त्रालयहरूलाई अपिल गर्दछु ।’

उनले संकटकाे अवस्थामा एम्बुलेन्सले सबै बिरामीलाई अस्पताल पुर्‍याउन पर्याप्त नहुने र दूरदराजका बिरामी निजी गाडीलाई २० वा ३० हजार रूपैयाँसम्म तिरेर अस्पताल आउन बाध्य भएको उल्लेख गरेका छन् । बिरामी महँगो भाडा तिरेर फलोअपमा आउन नसकेका कारण उपचारबाटै वञ्चित भइरहेकाले सरकारी गाडी प्रयोग गर्न उनले आग्रह गरेका हुन् ।

उनले कोभिड–१९ महामारीका कारण संकटमा परेका नागरिकलाई आकस्मिक सेवा सुनिश्चित गर्नु राज्यको जिम्मेवारी रहने स्मरणसमेत गरेका छन् ।