विराटनगर, बैशाख ८-विश्वभर महामारिका रुपमा फैलिएको कोरोना भाइरस(कोभिड–१९) संक्रमणको जोखिम न्युनिकरण गर्न मोरङको रतुवामाई नगरपालिकाका युवाहरु सकृय बनेका छन् ।

नगरमा विभिन्न सामाजिक काम गर्दै आएको रतुवामाई युवा नागरिक समाजको अगुवाईमा युवाहरु लक डाउनलाई पूर्णरुपले पालना गराउन र सीमामा निगरानी गर्न स्वयंसेवकका रुपमा आफै खटिएका हुन् ।

रतुवामाई युवा नागरिक समाजका संयोजक नारायणप्रसाद ताजुजुरियाले लक डाउन पूर्ण रुपले पालना गराउन, तरकारी बजारहरु व्यवस्थीत बनाउन र सीमा क्षेत्रबाट भारतीय नागरिक लुकिछिपि नेपाल प्रवेश गर्न नदिनका लागि सिमा क्षेत्रका वडा नं. १, २, ३ र ४ मा ४० जनाको संख्यामा युवाहरु खटिएको जानकारी दिए ।

‘भारतमा कोरोना संक्रमण तिब्र रुपमा फैलिएकाले हामी सिमा क्षेत्रका जनता यतिबेला निकै त्रासमका छौँ । सुरक्षाकर्मीहरुको उपस्थितीले मात्र लुकिछिपि नेपाल प्रवेश हुने क्रम रोक्न मुस्कील छ । त्यसैले उहाँहरुलाई साथ दिन र कुनै पनि भारतीय नागरिक नेपाल प्रवेश हुन नदिन २४ घण्टै सीमामा खटिएका हौँ ।’ उनले भने,‘सीमा नाका पूर्णरुपमा शिल भइसकेको अवस्थामा पनि नेपाल तर्फ प्रवेश गरेको सुचना पाएपछी हामी समुह समुहमा खटिएर सीमामा निगरानी बढाएका छौँ ।’

ताजपुरियाले आफुहरु नगरक्षेत्र भित्रका बजारहरु पूर्णरुपमा बन्द गराउन र तरकारी बजारहरुलाईसमेत सामाजिक दुरी कायम गराएर व्यवस्थीत रुपले सञ्चालन गराउन लागि सुरक्षाकर्मीको सहकार्यमा परिचालन भएको जानकारी दिए ।

उनले आफुहरुले नगरवासीलाई कोरोना भाइरसबाट बच्नका लागि जनचेतनामुलक कार्यक्रमहरु पनि गर्ने र संकटको वर्तमान अवस्थामा सवै काममा सरकार र प्रशासनलाई साथ दिनेसमेत बताए । उनले रतुवामाई नगरपालिकालाई खटिएका युवा तथा सुरक्षाकर्मीहरुका लागि ह्याण्ड ग्लब, मास्कलगायत आवश्यक सुरक्षा सामाग्रीहरु उपलब्ध गराइदिन आग्रह गरेका छन् ।