एजेन्सी, बैशाख ८-युरोपका स्पेन, इटाली, फ्रान्स, जर्मनीमा पछिल्लो केही दिन कोरोना संक्रमण घट्दो क्रममा रहे पनि बेलायत र रसियामा भने तीव्र गतिमा बढिरहेको छ ।

पछिल्लो २४ घण्टामा मात्र बेलायतमा ५ हजार ९ सय संक्रमित थपिँदा ५९६ जनाले ज्यान गुमाए । योसँगै बेलायतमा संक्रमितको कुल संख्या १ लाख २० हजार नाघ्दा १६ हजार ६० जनाको मृत्यु भइसकेको छ ।

त्यस्तै, रसियामा आइतबार एकै दिन ६ हजार ६० संक्रमितको पुष्टि हुँदा ४८ जनाले ज्यान गुमाए । योसँगै त्यहाँ संक्रमित हुनेको संख्या ४२ हजार ८ सय पुगेको छ ।

रसियामा मृतकको संख्या ३६१ पुगेको छ । पछिल्लो २४ घण्टामा स्पेनमा ४ हजार २ सय, इटालीमा ३ हजार, जर्मनीमा २ हजार, फ्रान्स, बेल्जियम, नेदरल्याण्ड्समा १–१ हजार संक्रमित थपिएका छन् ।

गत वर्षको डिसेम्बर अन्तिम साता चीनको वुहान शहरमा देखिएको कोरोना अहिले विश्वका २१० देशमा फैलिसकेको छ । सोमबार बिहानसम्म यो भाइरसका कारण २४ लाख ७ हजार व्यक्ति संक्रमित भइसकेका छन् । जसमध्ये १ लाख ६५ हजारले ज्यान गुमाउँदा ६ लाख १७ हजार संक्रमित भने उपचारपछि घर फर्किसकेका छन् ।