काठमाडौं, ७ वैशाख-कोरोना महामारीका कारण नेपाल–भारत सीमा पूर्णरूपमा बन्द रहेका बेला पनि मानव तस्करहरु सक्रिय रहेका छन् । भारत २१ मार्चदेखि पूर्ण रूपमा लकडाउन छ । योसँगै नेपाल–भारत सीमामा आवतजावत पनि ठप्प छ । लकडाउनकै बीच २४ मार्चमा भारतको उत्तरी राज्य राजस्थान पुर्‍याइएकी १ किशोरीलाई मानव बेचबिखनविरुद्ध कार्यरत संस्था ‘आफन्त नेपाल’ले उद्धार गरेको छ।

आफन्त नेपालका अनुसार पोखराकी १७ वर्षकी किशोरीलाई भारतको राजस्थानबाट उद्दार गरिएको हो । ती किशोरीले पोखरामा रहँदा १ जना चिनजानको महिलाले आफ्नो घरमा जाऔँ भनी लगेर मिठाई खान दिएको र त्यसपछि आफूलाई चक्कर आएर बेहोश भएको बताएकी छिन् । उनले होश खुल्दा अन्जान शहरमा पाएको बताएकी छिन् ।

‘आफूलाई सडकमा एक्लै पाएँ । र, आफू जोखिम अवस्थामा देखेपछि प्रहरीको सहयोग मागे । अहिलेको अवस्थालाई हेरेर प्रहरीले कोरोना परीक्षणका लागि अस्पताल भर्ना गरेको थियो ।’ ति किशोरीले भनेकी छिन् । अस्पतालको क्वारेन्टाइनमा रहँदा किशोरीको बारेमा क्वारेन्टाइनमै रहेका फ्रेन्च नागरिकलेउनको बारेमा नेपाल राजदूतावास नयाँदिल्लीलाई खबर गरेका थिए ।

किशोरीको बारेमा जानकारी पाएपछि दूतावासले ‘आफन्त नेपाल’लाई जानकारी दिएपछि विभिन्न माध्यमबाट अस्पताल व्यवस्थापनसँग सो संस्था सम्पर्क गरिएको जनाएको छ ।

संस्थाका निर्देशक इन्द्रराज भट्टराईका अनुसार किशोरीको उद्धार र पुनःस्थापनाका लागि राजस्थानको जयपुरस्थित चाईल्ड लाईन र जयपुर प्रहरीसँग समन्वय गरी कानुनी प्रक्रिया पूरा गरेपछि बालकल्याणको संरक्षणमा राखिएको छ ।

ति किशोरीको विषयमा दूतावासलगायत विभिन्न निकायले अनुसन्धान सुरु गर्नुका साथै हालको विषम परिस्थितिलाई मध्यनजर गर्दै परिस्थिति अनुकूल भएपछि स्वदेश फिर्ता गरिने बताइएको छ ।