एजेन्सी, बैशाख ६-अमेरिकाका विभिन्न राज्यहरुमा राष्ट्रपति डोनाल्ड ट्रम्पका समर्थकहरुले लकडाउनको विरोधमा बन्दुकसहित प्रदर्शन गरेका छन् । विशेषगरी डेमोक्रेट पार्टीको शासन रहेका राज्यहरुमा ट्रम्प पक्षधरले प्रदर्शन गरेका छन् । यो प्रदर्शनलाई राष्ट्रपति डोनाल्ड ट्रम्पले नै समर्थन गरेपछि झनै प्रदर्शनका घटना बढेको अमेरिकी सञ्चारमाध्यमले जनाएका छन् ।

कोरोना भाइरसको संक्रमण फैलिन नदिन राज्यहरुले लकडाउनका गरेको विरोधमा ट्रम्प समर्थकहरुले बन्दुकसहित सडकमा निस्किएर प्रदर्शन गरेका हुन् ।

प्रदर्शनसँगै राष्ट्रपति ट्रम्पले ट्वीट गर्दै प्रदर्शनकारीको माग अनुसार लकडाउन खुकुलो पार्न माग गरेका छन् । उनले मिनेसोटा, मिसिगन तथा भर्जिनिया राज्यमा लकडाउन खुकुलो पार्नुपर्ने ट्विटमा लेखेका छन् ।

लकडाउनका कारण आर्थिक गतिविधि ठप्प भएको र यसले नागरिकहरुलाई झनै समस्यामा पारेको प्रदर्शनकारीको भनाई छ । तर स्वास्थ्य अधिकारीहरुले लकडाउन खुकुलो पारेमा वा हटाएमा थप संक्रमण फैलिनसक्ने चेतावनी दिएका छन् ।

अमेरिकामा बिहीबारमात्रै कोरोना भाइरसका कारण ४ हजार ५ सय ९१ जनाको मृत्यु भएको थियो । अमेरिकामा पछिल्लो २४ घन्टामा २ हजार ५ सयभन्दा बढीको मृत्यु भएको छ । अमेरिकामा कोरोना भाइरसका कारण हालसम्म ३६ हजार ७७३ जनाको मृत्यु भइसकेको छ भने ७ लाखभन्दा बढी संक्रमित रहेका छन् ।

मृत्यु र संक्रमितको भयावह तथ्यांक बाहिर आइरहेका बेला अमेरिकाको मिसिगन, ओहायो, नर्थ क्यारोलिना, मिनेसोटा, उटा, भर्जिनिया र केन्टुकीमा प्रदर्शन भएको हो ।

राष्ट्रपछि ट्रम्पले आफ्नो ट्विटमा डेमोक्रेटको शासन रहेका राज्यको मात्रै नाम उल्लेख गरेका छन् । प्रदर्शन भएकामध्ये रिपब्लिकन पार्टीको शासन रहेको ओहायो र उटाको नाम ट्रम्पको ट्विटमा उल्लेख छैन । यी दुवै रिपब्लिकन पार्टीको शासन भएका राज्य हुन् । राष्ट्रपति ट्रम्पले लकडाउन खुला गर्ने तीन चरणका योजना सार्वजनिक गरेलगत्तै यस्ता प्रदर्शन भएका हुन् ।